Ырă йăла тăрăх, районти шкулсенче ĕçлекен пултаруллă учительсене çулсерен Раççей Федерацийĕн Патшалăх Думин депутачĕн Николай Маловăн премине парса чыслаççĕ. Кăçал çак чыса районти пилĕк учитель тивĕçнĕ. Пысăк опытлă, ачасемпе пĕр чĕлхе тупма пĕлекен, вĕсемшĕн чунĕсене пама хатĕр вĕрентекенсем районта сахал мар пирĕн. Кăçал Николай Маловăн премине тивĕçнĕ педагогсене те - Çĕн Атикасси шкулĕн директорне Вера Николаевна Парико-вана, Мăн Этмен шкулĕн математика учительне Анатолий Федорович Михеева, Хĕрлĕ Чутай шкулĕнче акăлчан чĕлхине вĕ-рентекен Галина Георгиевна Горбунована, "Хастар" физкультурăпа спорт комплексĕн ишме вĕрентекен инструкторне Юрий Иванович Столярова, Тури Çĕрпỹкасси шкулĕнче пуçламăш классене вĕрентекен Светлана Владимировна Лукинана - вĕсен йышне кĕртмелле. Паллах, çак премие депутат вĕрентекенсене тăрăшуллă ĕçĕшĕн хавхалантарас тесе пама йышăннă. Çак хавхалантарупа мĕнле усă курассине кашни хăй палăртать. Мăн Этмен шкулĕн учителĕ Анатолий Михеев, акă, депутат премине хăй ĕçлекен шкул валли шахмат комплектне туянма усă курасшăн. Çак оборудовани шкулти çамрăк шахматçăсене питĕ кирлĕ япала пуласса палăртать вĕрентекен. Анатолий МИХЕЕВ, Мăн Этмен шкулĕн математика учителĕ: - Эпĕ - ыттисенчен нимĕнпе те уйрăлса тăман вĕрентекен, шкул маншăн - пурнăç пĕлтерĕшĕ, - тет хăйĕн пирки Анатолий Федорович. - Ачасене пурне те питĕ юрататăп: ăслисене, ыттисенчен уйрăлса тăраканнисене, "йывăррисене", лара-тăра пĕлменнисене, талантлисене... Пурне те! Малашне те вĕсене пурнăçăн пысăк çулĕ çине тухма хатĕрлессипе, çынлăха вĕрентессипе çине тăрса ĕçлĕп, ачасене хамăн юратăва парса вĕсене те ыттисене юратма вĕрентĕп.

А.КАРПОВА.