Хĕрлĕ Чутай шкулĕнче 7 А класра ăс пухакан Дарья Сергеевна Романова декабрĕн 26-мĕшĕнче иртекен Мускаври елкăна хутшăнма ирĕк çĕнсе илнĕ республикăри маттур ачасен йышне кĕме пултарнă. Дарья пĕрремĕш класранах "5" паллăсемпе кăна ĕлкĕрсе пырать. Çулсеренех вăл район шайĕнчи тĕрлĕ предметсемпе иртнĕ олимпиадăсене хутшăнать, малти вырăнсене йышăнать. Вăл шахматла выляма ăста пулнине те пĕрре мар çирĕплетсе пачĕ. Темиçе çул ĕнтĕ республика шайĕнче çитĕнỹ хыççăн çитĕнỹ тăвать. Республика чысне хỹтĕлеме кăçал Сочине кайнă команда йышне те кĕнĕччĕ-ха Дарья. Пултарулăхĕ хĕр упраçăн тĕрлĕ енлĕ. Район сцени çинче хĕр тусĕсемпе пĕрле ташланине ăна пĕрре мар курнă. Республикăри талантлă ачасен делегацийĕ Мускава декабрĕн 24-мĕшĕнче çула тухать. Тепĕр кунне ачасене Запашнăйсен циркне курма илсе каяççĕ. Декабрĕн 26-мĕшĕнче вĕсем Кремль Керменĕнче Çĕнĕ çул елкине хутшăнаççĕ. Декабрĕн 27-мĕшĕнче хула курса çỹренĕ хыççăн каçхине çула тухаççĕ те 28-мĕшĕнче киле таврăнаççĕ.

Н.ПЕТРОВА.