Районти ялхуçалăх предприятийĕсемпе хресченпе фермер хуçалăхĕсем çуракине хатĕрленеççĕ. Ĕçе вăхăтра тата пахалăхлă тăвас тĕллевпе вĕсем çителĕклĕ вăрлăх хатĕрленĕ, техника та юсавлă.

Райадминистрацин ялхуçалăх пайĕнчен пĕлтернĕ тăрăх, кăçал район аграрийĕсем çурхи культурăсене 8038 гектар çинче акма палăртнă, вăл шутра пĕрчĕллĕ тата пăрçа йышши культурăсене - 7000 гектар çинче, апатлăх культурăсене - 900 гектар çинче (кукуруза - 300 гектар, çĕрулми - 35 гектар). Унсăр пуçне пĕлтĕр кĕрхи культурăсене 1784 гектар çинче акса хăварнă. Пĕтĕмпе пĕрчĕллĕ тата пăрçа йышши культурăсен лаптăкĕ 8784 гектар йышăнĕ (иртнĕ çулхипе танлаштарсан 162 процент).

Çурхи культурăсен вăрлăхĕ 747 тоннăпа танлашать. Вĕсенчен 100 проценчĕ кондициллĕ. Тухăçлăха ỹстерес тĕллевпе ялхуçалăх предприятийĕсем 250 тонна элитлă вăрлăх илме палăртнă. Мартăн 17-мĕшĕ тĕлне 45 тоннине туянса хунă.

Кĕрхи культурăсене, нумай çул ỹсекен курăксене апатлантарма 1040 тонна минераллă удобрени кирлĕ, 516 тоннине (планăн 50 проценчĕ) туяннă.

Çавăн пекех районта усă курман çĕр лаптăкĕсене пусă çаврăнăшне кĕртес енĕпе ĕçлеççĕ. Пĕлтĕр 318,5 гектар çĕре пусă çаврăнăшне кĕртнĕ, кăçал вара тата 250,2 гектар çĕре ĕçе кĕртесшĕн. Ялхуçалăх техникине хатĕрлес ĕç те вĕçленнĕ. Районти хуçалăхсенче 58 трактор, 17 автомашина, 21 сеялка, 30 культиватор тата 37 плуг шутланса тăрать. Çураки пуçланиччен пур ялхуçалăх техники те тĕрĕслев витĕр тухмалла.

Ялхуçалăх предприятийĕсемпе хресченпе фермер хуçалăхĕсенче 33 механизатор шутланса тăрать. Çурхи ака ĕçĕсем вăхăтĕнче тиев пĕр трактор пуçне 65 гектарпа танлашĕ.

А.ВАСЮКОВА.