Февралĕн 14-мĕшне эпир Юратакансен тата Çветтуй Валентин кунĕ теме хăнăхнă. Çак кун хăйсен уявне юратакансем, çавăн пекех Валентин тата Валентина ятлисем паллă тăваççĕ. Паянхи сăмахăма эпĕ шăпах çак ятпа çỹрекен, Хĕрлĕ Чутайри Çĕнĕ центрта пурăнакан Валентина Витальевна Михеева пирки пуçарасшăн.

Валентина Витальевна (хĕр чухнехи хушамачĕ Петрова) Астрахань облаçĕнче 1963 çулта çуралнă, анчах та ачалăхĕ унăн Хĕрлĕ Чутай салин Çĕнĕ центрĕнче иртнĕ. Çемьери тăваттăмĕш ача пулнă Валентина. Пĕтĕмпе вара çемьере пилĕк хĕрпе пĕр ывăл çитĕннĕ.

Хĕрлĕ Чутайри шкултан вĕренсе тухсан Валентина товаровед специальноçне алла илнĕ. Вăл 1983 çултан пуçласа райпо тытăмĕнче вăй хурать. 1994 çултанпа Валентина Михеева универсаллă ярмăрккă заведующийĕнче тимлет.

Валентина Витальевна 1984 çулта Ишеккассинчи Владимир Анатольевич Михеевпа çемье çавăрнă. Вĕсем икĕ ывăлне пурнăç парнеленĕ. Асли - Евгений - çемьеллĕ ĕнтĕ, ашшĕ-амăш-не пĕр мăнук парнеленĕ. Кĕçĕн ывăлĕ Виталий нумаях пулмасть салтак тивĕçне пурнăçласа таврăннă. Михеевсен ывăлĕсем иккĕшĕ те аслă пĕлỹллĕ.

- Хамăн ята эпĕ питĕ кăмăллатăп. Аннепе атте хăйсене Валентина ят килĕшнĕрен мана çак ята парас тенĕ. Маншăн февралĕн 14-мĕшĕ - пысăк уяв. Ăна эпир çулсеренех çемьепе паллă тăватпăр, мăшăрăм кашни çулах саламлать, парнепе савăнтарать, - пĕлтерчĕ Валентина Витальевна.

Н.МИДАКОВА.