Февралĕн 26-мĕшĕнче республика Пуçлăхĕ Михаил Игнатьев Чăвашпотребсоюз ертỹçипе, ЧР Патшалăх Канашĕн депутачĕпе Валерий Павловпа ĕçлĕ тĕлпулу ирттернĕ.

Валерий Павлов Чăвашпотребсоюзăн 2017 çулхи кăтартăвĕсемпе паллаштарнă, пĕлтĕрхи ĕç калăпăшĕ 11 млрд тенкĕпе танлашнине палăртнă. Тĕрлĕ шайри бюджета 700 миллион тенкĕ налук тỹленĕ. Чăвашпотребсоюз никĕсĕнчи учрежденисен техникăпа пурлăх базине 200 миллион тенкĕлĕх çирĕплетнĕ, яллă вырăнсенче 140 çĕнĕ объект уçнă.

Паянхи кун чăваш кооператорĕсем 60 пин хушма хуçалăхпа çыхăнса ĕçлеççĕ. Чăвашпотребсоюз çулсерен Раççейри потребсоюзсем хушшинче малтисен йышĕнче пырать. 2017 çулхи пĕрремĕш çур çул пĕтĕмлетĕвĕсемпе Центросоюзăн потребительсен 3 пин обществи хушшинче пĕтĕмĕшле ĕç кăтартăвĕсемпе пĕрремĕш вырăна Муркаш райповĕ, иккĕмĕшне - Çĕрпỹ райповĕ, виççĕмĕшне Етĕрне райповĕ тухнă.

Пуринчен те тухăçлăрах ĕçлесе пыраканни вара - Ишлей райповĕ, вăл кăçал Чăвашпотребсоюзăн куçса çỹрекен ялавне тивĕçнĕ. Чăвашпотребсоюзăн лавккисенче ытларах вырăнти тавар туса кăларакансен продукцине сутма тăрăшаççĕ. Хальхи вăхăтра сутакан алкоголь продукцийĕн 85 проценчĕ - чăвашра туса кăларнисем.

Михаил Игнатьев, Чăвашпотребсоюза малалла та ăнăçлă вăй хума суннă май, Валерий Павлова тухăçлă ĕçлесе пынăшăн тав тунă, уйрăмах Чăвашпотребсоюз яллă вырăнсенче пурăнакансене ĕçпе тивĕçтернине ырланă. Алкоголь продукцине сутнă акцизсем республика бюджетне кĕнине палăртнă.

Февралĕн 28-мĕшĕнче Шупашкарта Чăваш Енри потребкоопераци 125 çул тултарнине халалланă мероприяти иртнĕ. Унта райпо ĕçченĕсем те хутшăннă, наградăсене тивĕçнĕ.

(Тĕплĕнрех çитес номерте).

А.СЕМЕНОВА.