Пирĕн хушăра муниципаллă округăн обществăлла пурнăçне, тĕрлĕ конкурссене хастар хутшăнакан çемьсем пурри савăнтарать. Паян сире нумаях пулмасть "Çулталăк çемйи" конкурсăн муниципаллă тапхăрне хутшăнма кăмăл тунă çемьесемпе паллаштаратпăр.

. Алевтинăпа Владимир ЯРЫЛКИНСЕМ Серенкассинче пурăнаççĕ. Вĕсем ывăлпа хĕр çуратса ỹстернĕ. Çавăн пекех мăшăр пилĕк ачана хỹтлĕхе илсе вĕсене çемье ăшшине парнеленĕ. Палăртма кăмăллă, "Çулталăк çемйи" конкурсăн муниципаллă тапхăрĕнче шăпах Ярылкинсен туслă çемйи мала тухрĕ. Вĕсем муниципаллă округ чысне республика шайĕнче хỹтĕлĕç.

. Алинăпа Игорь МОКШИНСЕМ Ачкасси ялĕнче пурăнаççĕ. Вĕсем 20 çул ытла алла-аллăн пĕрле утаççĕ. Мăшăр хĕрпе ывăл ỹстерет. Мокшинсем хулара пурăннă хыççăн чун туртнипе яла таврăннă, çурт туяннă, ялта ĕçлесе пурăнмалли хатĕр-хĕтĕр илнĕ. Палăртмалла, Алина Игоревна муниципаллă округ администрацийĕнче право тивĕçтерĕвĕн пайĕнче юристра тăрăшать. Мокшинсем ялта ĕçлесе пурăнма килĕшнине палăртаççĕ.

. Алинăпа Василий АБАСЬКИНСЕМ Атнарта тĕпленнĕ. Çамрăксем "Коминтерн" ЯХПК-ра паллашнă. Алина ун чухне практикăна килнĕ, Василий вара хуçалăхра водительте тимленĕ. Çамрăк мăшăр пурнăç çулĕпе пĕр сукмакпа 13 çул утать. Абаськинсен 3 хĕр пĕрчи ỹсет. Дарья тата Яна хĕрĕсем Атнарти шкулта ăс пухаççĕ, кĕçĕн хĕрĕ Есения вара "Пучах" ача садне çỹрет. Кил ăшшине упракан Алина Львовна хальхи вăхăтра муниципаллă округ администрацийĕнче мобилизаци хатĕрленĕвĕн, ятарлă программăсен тата гражданла оборонăпа чрезвычайлă лару-тăрусен пайĕнче тимлет. Василий Юрьевич вара Хĕрлĕ Чутайри газ участокĕнче ĕçлет.

. Алинăпа Владимир МИХЕЕВСЕМ Хĕрлĕ Чутай салинче пурăнаççĕ. Мăшăр 20 çул килĕштерсе пурăнать. Çемьере икĕ ывăлпа пĕр хĕр ỹсет. Алина Владимировнăпа Владимир Владимирович иккĕшĕ те муниципаллă округ администрацийĕнче ĕçлеççĕ. Паллашма та вĕсем кунтах паллашнă, унтанпа пĕр-пĕринпе уйрăлман та...