Апрелĕн 24-мĕшĕнче Шупашкарта иртнĕ ЧР Патшалăх Канашĕн ларăвĕнче республика Пуçлăхĕ Михаил Игнатьев Министрсен Кабинечĕн 2017 çулхи ĕç-хĕлĕ пирки отчет туса панă.

Ларăва пухăннисем умĕнче тухса калаçнă май Михаил Игнатьев республикăра пĕлтĕр промышленность тата ялхуçалăх производстви, инвестицисем, шалу ỹснине, инфляци шайĕ чакнине, бюджет укçипе усă курассин кăтартулăхĕ пысăкланнине каланă. Асăннă ырă кăтартусем социаллă пурнăçпа экономика аталанăвне çĕнĕ условисенче йĕркелеме май параççĕ.

Комментари

Любовь КУЗНЕЦОВА, Хусанушкăнь ял тăрăхĕн пуçлăхĕ:

- Республика Пуçлăхĕ Михаил Игнатьев ЧР Министрсен Кабинечĕн 2017 çулхи ĕç-хĕлĕпе паллаштарнă май республикăра ялта пурăнакансен пурнăçне ырă енне улăштар-ма чылай ĕç туни пирки каларĕ. Тĕслĕхрен, "Устойчивое развитие сельских территорий" программăпа килĕшỹллĕн пĕлтĕр 894,3 млн тенкĕпе усă курнă. Пĕлтĕр республика территорийĕнче обществăлла инфратытăма аталантармалли проектсене пурнăçлама пуçларĕç.

Кăçал районта обществăлла пуçарупа 17 проект пурнăçламалла, вĕсенчен пĕрине эпир хамăр ял тăрăхĕнче хута ятăмăр та ĕнтĕ. Апрелĕн 20-мĕшĕнче Тракушкăнь ялĕнче ачасен вылямалли площадкине вырнаçтартăмăр. Çитес вăхăтра ун çумĕнчи лаптăка тирпейлесе илемлетес ĕçсене те пурнăçлăпăр.