Çуллахи ăшă кунсем çитсен республикăра икĕ урапаллă техникăна вăрланă тĕслĕхсем йышланаççĕ. 2017 çулта район территорийĕнче велосипед вăрланă виçĕ тĕслĕхе регистрацилерĕмĕр. Иртнĕ эрнере вара Питĕркассинче тата Хĕрлĕ Чу-тайра велосипедсем вăрланине пĕлтерчĕç.

Велосипедсем те, скутерсем те - хаклă техника. Вĕсене яваплăха туйса упрамалла. Çапла тумасан вăл "ураланма" та пултарать. Тимлĕхе çухатни усал шухăшлă çынсемшĕн лайăх кăна. Вĕсем вăрланă япалана сутса яма та пултараççĕ. Айăпĕ вара ытларах чухне - транспорт хуçи икĕ урапаллă техникăна тимлĕхсĕр хăварнинче: е подъезд умĕнче, е лавкка çывăхĕнче. Ют пурлăх çине куç хывнă çынсем пĕр самантлăха пăрăнсан та техникăна вăрлама пултараççĕ. Кун пекки тăтăшах тĕл пулать.

Хисеплĕ граждансем, велосипедсемпе скутерсен хуçисем, хăвăр пурлăха хỹтĕлесе хăварасшăн пулсан унăн хăрушсăрлăхĕ пирки манмалла мар. Ют çыннăн техникăна вăрлама шухăш та ан çуралтăр. Çавăнпа та ăна урамра тимлĕхсĕр ан хăварăр: подъезд умĕнче те, уйрăм çурт çумĕнче те. Ашшĕ-амăшĕн çак енĕпе ачисемпе калаçу ирттермелле.

Сирĕн кил-çуртăр умĕнче, урамра шанчăксăртарах çынсене асăрхасан е ют пурлăха вăрланă тĕслĕхсем пирки информаци пулсан ним тăхтаса тăмасăрах полици уйрăмне шăнкăравласа пĕлтерме ыйтатпăр. Пирĕн телефон: 02 е 2-11-02.

А.МИХОПАРКИН, районти полици уйрăмĕн начальникĕ.