"Ỹкессе пĕлес пулсан тỹшек сарса хурăттăмччĕ", - тенĕ ватăсем авалах. Тỹшекне сарса хумалла-ши е инкекĕ ан пултăр тесе тимлĕхне ытларах ỹстермелле-ши? Шухăшăма малалла тăснă май сăмахăма, шел пулин те, паянхи куншăн синкерлĕ пулăм çине куçарасшăн. Вăл - терроризм. Ăна нимĕнле наципе те, тĕнпе те çыхăнтарайман. Унăн чăн-чăн сăнĕ те çук. Усал шухăш тытнă çынсем тăнăç пурнăçпа пурăнакан çынсене шар кăтартаççĕ, алла хĕç-пăшал тытса ним айăпсăр çынсем çине тапăнаççĕ, ачасене те уяса тăмаççĕ. Вĕсен тĕллевĕ - обществăна хăратасси тата аркатасси. Шел пулин те, пирĕн общество пĕрре кăна мар кун пек тискерлĕхпе тĕл пулчĕ. Бесланта, Дубровскинчи театр центрĕнче, Буденновск-ра, Буйнакскра, Волгодонскра, Мускаври пурăнакан çуртсенче террористсен тискер аллисенчен ним айăпсăр çынсем вилнĕ. Кун пекки текех нихăçан та ан пултăрччĕ. Ним айăпсăр çынсен пурнăçĕ ан татăлтăр тесен вара пирĕн кашнийĕнех тимлĕхе нихçанхинчен те ытларах ỹстермелле.

Çĕнĕ вĕренỹ çулĕ умĕн ятарлă комисси шкулсемпе ача сачĕсене çитсе учрежденисем ачасене йышăнма хатĕррине тĕрĕсленĕ, терроризма хирĕç хăрушлăхпа тивĕçтерес ĕçсене мĕнлерех йĕркелени çине те тимлĕх уйăрнă.

Çакна та палăртса хăвармалла, шкулсемпе ача сачĕсенче видеосăнав тытăмне йĕркеленĕ, чрезвычайлă лару-тăрура е пушарта хăвăрт пĕлтересси пур. Пур вĕренỹ учрежденийĕнче те кĕме май паракан йĕрке ĕçлет, ăна пула ют çынсем çурта е территорие лекеймеççĕ. Кĕрекенсене хăçан кĕнипе тухнине палăртса ятарлă журнала çырса пыраççĕ.

Хамăрăн та тимлĕхе çухатас марччĕ. Терроризм вăл хăрушă, унран сыхланни кирлĕ!