90 тата ун хыççăнхи сумлă юбилейсене паллă тăвакансене Раççей Президенчĕ Владимир Путин ячĕпе саламласси районта йăлана кĕчĕ ĕнтĕ. Акă нумаях пулмасть Енкĕлт ялĕнче пурăнакан тылпа ĕç ветеранĕ Мария Григорьевна Сякаева 90 çул тултарнă ятпа салам сăмахĕсем йышăннă. Июлĕн 5-мĕшĕнче Анат Çĕрпỹкасси ялĕнче пурăнакан Анна Кузьминична Иванова хăйĕн 90 çулхи юбилейне кĕтсе илнĕ. Çак ятпа вăл РФ Президенчĕн саламлă Çырăвне йышăннă. Нушине сахал мар курнă тыл ĕçченĕ. Çĕнтерĕве çывхартас тĕллевпе ĕçе пуçăннă, мирлĕ пурнăçшăн тăрăшнă. Йывăрлăхсене парăнман, ĕçрен хăраман, малаллах талпăннă.

"Чухăнран та чухăн пурăнтăмăр, атте-анне килĕ икĕ хутчен кĕл пулса тăпрапа танлашрĕ, тăхăнмалли те пул-ман", - куççуль витĕр аса илет вăрçă çулĕсене ветеран. Апла пулин те вашават та ырă кăмăллăскер, çулĕсене пăхмасăр вăй-хăват, çивĕч ăс-тăн упраса хăварнă. Вăл халĕ те пурнăç çине савăк куçпа пăхать, ĕçле-ме кăмăллать. Кун-çул иртнĕçем çак туйăмсем унра вăйланнă çеç. Паянхи кун Анна Кузьминичнăна хĕрĕ пăхса пурăнать, ватă мăнукĕсен тата кĕçĕн мăнукĕсен тимлĕхне, юратăвне, ăшшине туять, вĕсен çитĕнĕвĕсемпе савăнать.

А.АЛЕКСЕЕВА.