Юлашки вăхăтра эпĕ, районти вăрçă ачисен обществин председателĕ пулнă май, Чутай тăрăхĕнчен Аслă Отечественнăй вăрçа миçе çын тухса кайнипе, каялла миçен таврăннипе интереслентĕм. "Астăвăм кĕнекинче", шел те, районти чылай салтакăн ячĕ-шывĕ те çук. Çакăн пеккисен шутĕнче - манăн иккĕмĕш сыпăкри пичче те.

Николай Сергеевич Федотов, манăн иккĕмĕш сыпăкри пичче, 1925 çулта Шорово ялĕнче çуралнă. Вĕсем çемьере тăваттăн ỹснĕ - виçĕ хĕрпе пĕр ывăл. Йăмăкĕсем халĕ те сывах пурăнаççĕ.

Николай Сергеевича 18 çула çитсен 1943 çулта вăрçă хирне илсе кайнă. Вăл службăра 1946 çулчченех пулнă. Польшăна ирĕке кăларнă çĕре хутшăннă, çавăн чухне Мухтав орденне тивĕçнĕ. Çавăнти çапăçура вăл йывăр аманнă, анчах та сывалса тухсан службăрах юлма килĕшнĕ.

Николай Федотов "За отвагу" медале те тивĕçнĕ.

Çартан таврăнсан вăл тăван колхозра вăй хунă. Коминтерн ячĕпе хисепленекен хуçалăхра тĕрлĕ ĕçре тăрăшнă.

Вăл пире вăрçăра пулни-иртни пирки каласа паратчĕ. Вăхăт иртнĕ май эпĕ ỹссе çитсе тăван ялтан кайрăм, каялла часах таврăнаймарăм. Çав хушăра, 1965 çулта, иккĕмĕш сыпăкри пиччем вилнĕ.

Николай Сергеевич вилнĕ хыççăн унăн орденĕпе медальне Атнарти музея илсе кайнă.

Иккĕмĕш сыпăкри пиччен ячĕ "Астăвăм кĕнекинче" пулманран эпĕ ун пирки Етĕрнери военкоматран ыйтса ятăм. Унтан килнĕ хурав тăрăх, Николай Федотов вăрçăра пулман пек курăнать. Вара эпир тăвансемпе интернет урлă шыраса Николай Сергеевич Федотов вăрçă вăхăтĕнче хăш тĕлте çапăçнине, паттăрлăх кăтартса мĕнле орден-медале тивĕçнине тупса палăртрăмăр.

Сергей БАРИНОВ, вăрçă ачисен районти обществин председателĕ.