Çак сăнỹкерчĕксене пирĕн пата хаçат вулакансем илсе килчĕç. Утаркасси енне каякан автоçула ỹкернĕ унта. Ку çул çинче "Стройресурс" ТЯО çуркуннех юсав ĕçĕсем ирттерме пуçланă иккен, ĕçĕ вара халĕ те вĕçленмен. Çакăн пек шăтăк-путăклă çулсемпе çỹреме тивнĕшĕн пăшăрханса калаçаççĕ Пантьăк ял тăрăхĕнче пурăнакансем. "Шăтăксен тĕпне вак чул хунă пекки турĕç те çухалчĕç çул юсакансем. Хăçан вĕçленĕ-ши ку çул çинчи юсав, хăçан йĕркеллĕ çулсемпе çỹреме пуçлăпăр?" - теççĕ вĕсем.

Çак ыйтусен хуравне тупас тесе эпир район администрацийĕн строительство, çул-йĕр тата коммуналлă хуçалăх пайĕн начальникĕпе Алексей Ильинпа çыхăнтăмăр. "Асăннă çул çинчи юсав ĕçĕсене кăçал туса пĕтереççĕ, - терĕ Алексей Геннадьевич. - Укçа-тенкĕпе çыхăннă ыйтусене татса парсан, çанталăк лайăх тăрсан çак кунсенчех вĕçлемелле".

Çулталăк вĕçлениччен тата виçĕ уйăх кăна юлчĕ - хĕл лариччен лайăх çанталăк тата миçе кун пулĕ-ши? Çак кунсенче ăшă, хĕвеллĕ, типĕ кунсем пулмарĕç-и вара? Вĕсемпе усă курса юлмалла марччĕ-ши подрядчикăн? Юсав ĕçĕсене çуркуннех пуçланă-тăк, мĕншĕн финанс ыйтăвĕсене халĕ те татса паман? Куратпăр ĕнтĕ, яланхи пекех, районти çулсем çинче юсав ĕçĕсем ирттернĕ чух чылай ыйту çуралать, хуравĕсене тата ĕç вĕçленессе вара вăрах кĕтме тивет.

Алина ИТТИ.