Юлашки çулсенче республикăра çĕнĕ фельдшерпа акушер пункчĕсем çĕнелсех пыраççĕ. Акă çак кунсенче Канаш районĕнче харăсах виçĕ ФАП уçăлнă. Медицина пулăшăвĕ памалли çуртсен пахалăхне республика Пуçлăхĕ Олег Николаев та хакланă, вырăнта пурăнакансемпе калаçнă, малашне те сывлăх сыхлавĕн учрежденийĕсене модернизацилес енĕпе ĕçсем пурнăçланассине пĕлтернĕ.

Палăртмалла, ку енĕпе районта та ĕçсем пурнăçланса пыраççĕ. 2013 çултанпа район территорийĕнче медицина пулăшăвĕпе тивĕçтерекен 11 çĕнĕ фельдшерпа акушер пункчĕ çĕкленнĕ. Паянхи куна Туканашра, Çĕн Атикассинче, Иккĕмĕш Хурашашра, Тихăнушкăнче, Çĕн Атикассинче, Анат Çĕрпỹкассинче, Серенкассинче, Ачкассинче, Кив Атикассинче, Трапайра, Яманкассинче çĕнĕ фельдшерпа акушер пункчĕсем ĕçлеççĕ. Район больницинчен пĕлтернĕ тăрăх, çитес çул Ваçкаçырминче, Пантьăкра тата Березовкăра çĕнĕ ФАП-сем çĕклеме пăхса хунă. Штанашра та халăха валли çĕнĕ амбулатори уйрăмне тума палăртаççĕ.

Хальхи вăхăтра, "Сывлăх сыхлавĕ" наци проекчĕпе килĕшỹллĕн, район больницин терапи уйрăмĕнче (кăнтăрлахи стационарта), çавăн пекех поликлиникăн иккĕмĕш хутĕнче капиталлă юсав ĕçĕсем пыраççĕ. Ĕçсене "Гарант" общество пурнăçлать. Кунта харăсах çурт стенисен штукатуркине çĕнетеççĕ, шпаклевка тăваççĕ, урайне плитка сараççĕ. Юсав ĕçĕсене пурнăçлама республика бюджетĕнчен 7,5 миллион тенкĕ уйăрнă.

Районти медицина учрежденийĕсем çитес çулсенче те çĕнелсе пырĕç. Планпа район больницин хирурги уйрăмĕн стационар корпусне, медицина профилактикин пỹлĕмне çĕнетмелле. Унсăр пуçне территорие хăтлăх кỹрес енĕпе те ĕçлеме палăртнă.

Юсав ĕçĕсем кунпах вĕçленмеççĕ. Федераллă бюджет шучĕпе çитес çул Мишеркассинчи пĕтĕмĕшле практика врачĕн уйрăмĕнче, Хăмарккари тата Тури Çĕрпỹкассинчи фельдшерпа акушер пункчĕсенче капиталлă юсав ĕçĕсем ирттермелле.

Паллă ĕнтĕ, фельдшерпа акушер пункчĕсене уçни ялсенче пурăнакансемшĕн питĕ лайăх. Район центрĕнчен аякра пурăнакансем инçе çула кашнинчех тухаймаççĕ. Çакă уйрăмах ватă çынсене пырса тивет. Эмел туянмалла-и, юн пусăмне тĕрĕслеттермелле-и - çак пулăшусене вырăнтах илме май пурри питĕ меллĕ.

Чăн та, ФАП-сем - ял çыннисене пĕрремĕш пулăшу паракан медицина учрежденийĕсем. Вĕсем малашне те çĕнелсех пыччăр, унти специалистсем хальхи пурнăçпа тан пырса халăха чир-чĕртен хăтăлма пулăшчăр.

А.ВАСЮКОВА.