Октябрĕн 12-мĕшĕнче Раççей Банкĕ пирĕн çĕршыв халăхĕ суйланă символсемлĕ 200 тата 2000 тенкĕлĕх банкнотăсене çаврăнăша кăларнă. 200 тенкĕлĕххин тĕп тĕсĕ - симĕс. Ун çинче Севастополь символĕсене вырнаçтарнă: пиччĕн енче - путнă карапсен палăкĕ, тепĕр енче - Таврически Херсонес ỹкерчĕкĕ. Çак банкнотăна çирĕплĕхне ỹстернĕ мамăк хут çинче пичетленĕ, çакă ăна кивелесрен тата ĕмĕрĕ кĕскелесрен пулăшĕ. 2000 тенкĕлĕх укçа вара кăвак тĕслĕ. Унăн пиччĕн енче Русский ятлă утрав патне пыракан кĕперĕн ỹкерчĕкне курма пулать, тепĕр енче - Амур облаçĕнчи "Восточный" космодрома. Тенкĕ символĕн ỹкерчĕкне темиçе çĕрлĕ вырнаçтарнă: хỹтĕлев çиппи тата пĕчĕк ỹкерчĕксем çинче. Цифрăсем ытти купюрăсенчисемпе танлаштарсан пысăкрах, вĕсем сисĕмлĕ мăкăльлĕ. Çакна куçĕсем япăхрах куракан çынсем те укçана палăртма пултарччăр тесе ятарласа тунă. Икĕ банкноти çинче те Раççей Федерацийĕн Гербне вырнаçтарнă. Кашнин пиччĕн енче QR-код та пур. Унта Раççей Банкĕн страницине тупмалли ссылкăна асăрхама пулать, ун тăрăх асăннă банкнотăсен хỹтĕлев паллисем пирки тата ытти кирлĕ информаципе паллашма май пур. Аса илтеретпĕр, çĕнĕ банкнотăсен символĕсене 2016 çулта конкурс ирттерсе суйланă. Пилĕк пин ытла заяв-кăран конкурс списокне 49 регионти тĕрлĕ паллă вырăнсем пирки 76 сĕнỹ кĕнĕ. Ку списокран 10 финалист суйласа илнĕ. Конкурсăн юлашки тапхăрĕнче вара çĕршывĕпех сасăлав (унта 3 миллион ытла çын хутшăннă) ирттерсе çĕнтерỹçĕсене палăртнă: Инçет Хĕвелтухăç тата Севастополь символĕсем. Конкурс пĕтĕмлетĕвĕсене "Россия 1" телеканал эфирĕнче 2016 çулхи октябрĕн 7-мĕшĕнче пĕлтернĕ.

Н.ИВАНОВА.