Хальхи вăхăтра коронавирус инфекцийĕпе çыхăннă лару-тăру пĕтĕм тĕнчипех çивĕч тăрать. Çавна май паянхи кун медицина ĕçченĕсемсĕр пуçне çак амакпа волонтерсем те кĕрешеççĕ. Халĕ вĕсем хăрушлăх зонине кĕрекенсене, аслă ỹсĕмрисене, пур енлĕ пулăшма тăрăшаççĕ. Килтен тухма пултарайман ватăсене апат-çимĕçпе, кирлĕ эмелсемпе кам вăхăтра тивĕçтерĕ-ха? Çак ĕçе шăпах волонтерсем пурнăçлаççĕ.

Волонтерсен юхăмĕ район территорийĕнче те аталаннă. Ун тытăмне воспитательсем, учительсем, шкул ачисем, тĕрлĕ организацисен ĕçченĕсем кĕреççĕ. Вĕсене пурне те паянхи кун пĕр тĕллев пĕрлештерсе тăрать - вăйсăррисене, ватă çынсене пулăшасси. Яваплăха туйса ĕçлени вара кирек мĕнле йывăрлăха та çĕнтерме пулăшать.

Ваттисене ĕçпе тата сăмахпа пулăшма васкакансенчен пĕри - Çĕн Атикасси шкулĕ çумĕнчи ача сачĕн воспитателĕ Анна Якимова. Вăл санитарипе эпидемиологи лару-тăрăвĕнче волонтер пулма кăмăл тунă. Халĕ вăл Хурашашра пурăнакан ватăсене кунсерен апат-çимĕçпе тата эмелсемпе тивĕçтерет.

Çавăн пекех волонтерсен юхăмне Мăн Этмен шкулĕнче 11-мĕш класра вĕренекен Даниил Чернов та кĕнĕ. Шкул ачи пĕччен пурăнакан ватăсене хуçалăхри ĕçсене пурнăçлама пулăшать, вĕсене шыв тата вутă кĕртсе парать. Çав хушăрах вĕренме те ĕлкĕрет каччă.

Хĕрлĕ Чутай райповĕн волонтерĕсем те пандеми вăхăтĕнче яваплăха туйса ĕçлеççĕ. Кунта тăрăшакан Елена Кудряшова, Надежда Соколова, Светлана Сильвестрова район больниципе пĕрле ватăсене апат-çимĕç, тỹлевсĕр эмелсем çитерсе параççĕ, ăшă сăмахпа та пулăшаççĕ. Калас пулать, Надежда Соколова Тихăнушкăнь, Мăн Этмен, Питĕркасси ялĕсенче пурăнакан çынсем патне çитсе тĕрлĕ эмелсемпе тивĕçтернĕ.

Çакă районта ырă ĕç тăвакансен списокĕн пĕчĕк пайĕ кăна. Вĕсен кашнин çемье тата ачисем, ĕç. Апла пулин те пушă вăхăт тупăнсанах вĕсем йывăрлăха лекнĕ çынсене пулăшма васкаççĕ, кил-тĕрĕшре пулăшаççĕ. Çак пархатарлă ĕçе пурнăçлама вĕсен сывлăхĕ таса та çирĕп пултăр.

А.ВАСЮКОВА.