Сăр тата Хусан хỹтĕлев чиккисен строителĕсен ĕç паттăрлăхне халалланă çулталăк пынă май район администрацийĕпе хĕрлĕчутайсен "Чавал" ентешлĕхĕ пуçарнипе мартăн 22-мĕшĕнчен тытăнса апрелĕн 23-мĕшĕччен сочиненисен конкурсне ирттерме йышăннă. Вăл шкул ачисен патриотлăх тата гражданлăх туйăмĕсене йĕркелес, çемьепе Тăван ене юратма хăнăхтарас, Аслă Отечественнăй вăрçă историне тĕпчеме кăсăклантарас, ветерансемпе тыл ĕçченĕсене, Сăр тата Хусан хỹтĕлев чиккисене тума хутшăннисене хисеплеме вĕрентес тĕллевлĕ.

Конкурса районти 5-9 классенче ăс пухакан ачасен ĕçĕсем кăна хутшăнма пултараççĕ. Сочинение чăвашла та, вырăсла та çырма юрать. Унăн калăпăшĕ А4 форматлă икĕ страницăран сахал пулмалла мар, сăнỹкерчĕксемпе пуянлатсан аванрах. Сочиненире тыл ĕçченĕсем Сăр хỹтĕлев чиккине тума хутшăннă çынсем пирки, Аслă Отечественнăй вăрçа хутшăннă тăвансемпе кỹршĕсем тата вăрçă ачисем çинчен çырни, вĕсен асаилĕвĕсем пулмалла.

Конкурс икĕ тапхăрпа иртĕ. Пĕрремĕш тапхăрта - апрель уйăхĕн 19-23-мĕшĕсенче - сочиненисене шкулти вĕрентекенсем пăхса тухаççĕ, кашни шкулта чи лайăх икĕ ĕç суйлаççĕ. Иккĕмĕш тапхăрта - апрель уйăхĕн 26-30-мĕшĕсенче - шкул учителĕсем суйласа илнĕ сочиненисене район администрацийĕн вĕрентỹ пайне çитереççĕ. Ĕçсене ятарласа йĕркеленĕ эксперт комиссийĕ пăхса тухать. Конкурса майăн 5-мĕшĕнче пĕтĕмлетеççĕ.

Н.ИВАНОВА.