Çитес вырсарникун, мартăн 21-мĕшĕнче, хăйсен професси уявне йăла ыйтăвĕсемпе тивĕçтерекенсем тата коммуналлă хуçалăх ĕçченĕсем паллă тăваççĕ.

"Красночетайскагропромснаб" муниципаллă предприяти халăха сивĕ шывпа, ăшăпа тивĕçтерессишĕн яваплă, шыв юхса тухас тытăма та вĕсем пăхса тăраççĕ. Предприяти пурĕ районти нумай хваттерлĕ 37 çуртра пурăнакан 980 абонента тата 58 предприятие коммуналлă ыйтусемпе тивĕçтерсе тăрать.

Коллектива 2020 çулхи май уйăхĕнчен тытăнса Валерий Иванович Жиганов ертсе пырать. Чылай çул ĕçлекенсем те пур коллективра. Акă Валерий Николаевич Сатлайкин коммуналлă хуçалăх тытăмĕнче 29 çул ĕнтĕ тăрăшать. Пурĕ вара коллектив 17 çынран тăрать. Кашниех хăйне шанса панă тивĕçе тỹрĕ кăмăлпа пурнăçлама тăрăшать.

"2020-2021 çулсенчи хĕллехи ăшăтмалли тапхăра лайăх хатĕрлентĕмĕр, ăна йĕркеллĕ ирттертĕмĕр, пысăк кăлтăксем, телее, сиксе тухмарĕç. Пачах йывăрлăхсемсĕр пулмарĕ паллах. Шыв пăрăхĕсен аварийĕсем пулчĕç, шыв юхса тухас тытăм тулса ларни те тĕл пулчĕ, вĕсене çийĕнчех сиртĕмĕр, çавна май халăхран шалăп та пулмарĕ", - пĕлтерчĕ Валерий Жиганов.

Коллектив малашне те пур ĕçе тĕплĕн палăртса, тỹрĕ кăмăлпа та яваплăха туйса пурнăçласан районти халăх шывпа, ăшăпа тата юхса тухас тытăмпа пĕр кăлтăксăр усă курĕ.

Н.ПЕТРОВА.