Çуркунне çитсенех, юр кайса пĕтсенех çулсерен типĕ курăк тата çỹп-çап çунтарнине пула тухнă пушарсен хи-сепĕ нумайланать. Акă юр куç умĕнчен вуçех çухалса та пĕтеймерĕ, кун евĕр пĕр тĕслĕх апрелĕн 14-мĕшĕнче пулса та илчĕ. Районти пушар асăрхав пайĕн начальникĕ Алексей Ярабаев пĕлтернĕ тăрăх, Арайкасси ялĕ çывăхĕнчи 100 гек-тара яхăн лаптăк çуннă. Пĕлтĕр тасатса хăварман лаптăк хыт хурапа тулнă, типĕ курăк хăвăрт илсе кайса сарăлнă. Халĕ хуçин хăйĕн лаптăкне çумкурăкпа хыт хураран тасатманшăн штраф тỹлеме тивет.

Ытларах чухне типĕ курăк çын айăпĕпе çунать. Тимсĕрлĕхе пула е çил хăвăртлăхĕ пысăккипе çулăм хăвăртах пысăк территорие сарăлма пултарать. Асра тытăр! Типĕ курăка çунтарнă май тухнă пушара пула çынсем çуртсăр та тăрса юлаяççĕ. Кун пек тĕслĕх апрелĕн 14-мĕшĕнче Çĕмĕрле районĕнчи Вырăс Алгаш салинче пулнă, харăс тăватă çурт çунса кĕлленнĕ.

Ытти çулсенче масар картисем çуннă тĕслĕх те сахал мар пулчĕ районта. Çывăхри ялсем шар курас хăрушлăх та пур. Çавăнпа та пĕччен чухне тивертсе янă курăка сỹнтерме питĕ йывăррине асра тытмалла, типĕ курăка чĕртмелле мар.

Алексей Владимирович палăртнă тăрăх, пушар хăрушсăрлăх мерисене пăхăнмалли мĕнпур требованисене 2020 çулхи сентябрĕн 16-мĕшĕнчи "Раççей Федерацийĕнче пушара хирĕçле режимăн Правилисене çирĕплетесси çинчен" 1479 № постановленипе çирĕплетнĕ.

Чылайăшĕ халĕ хĕвел пăхнипе усă курса çурт умĕнчи тата йĕри-таврари территорие тирпейлеме тăрăшать. Тирпейлени лайăх-ха, анчах та вут чĕртсен асăннă Правилăсене çирĕп пăхăнмаллине асра тытмалла. Пăхăнманнине пула пушар тухасси те инçе мар, айăплисен административлă, уголовлă явап тытма тивет.

Çунакан çỹп-çап куписене, вĕсем çывăхра мар пулсан та, тимлĕхсĕр хăварма е ачасене пăхса тăма шанма юрамасть. Кỹршĕсем хăйсем тирпейленĕ хыççăн чĕртнĕ çỹп-çап куписене пăхса тăманнине курсан вĕсене асăрхаттарăр.

2020 çулта çỹп-çаппа типĕ курăк çунтарнипе тухнă 15 пушар пулчĕ. Иртнĕ çул çуркунне ир килнĕ май апрелĕн 15-мĕшĕ тĕлне 11 вут-çулăм инкекĕ пулнă пулсан, кун пек 6 тĕслĕхе регистрациленĕч чĕ: 4 хутчен типĕ курăк тата 2 хутчен çỹп-çап çуннăччĕ.

Республикăра апрелĕн 25-мĕшĕнчен тытăнса ятарлă пушара хирĕçле режим çирĕплетме йышăннă. Çав кунтан пуçласа кăвайт чĕртме, кăмрăк çинче тĕрлĕ апат хатĕрлеме, вăрманта е ун çывăхĕнче çỹп-çап тата типĕ курăк çунтарма юрамасть. IV тата V-мĕш класлă пушар хăрушлăхĕ тăнă вăхăтра вăрмана кайма тăхтаса тăмалла.

РФ КоАП-ĕн 20.4 статйин 1 тата 2-мĕш пункчĕсемпе килĕшỹллĕн, çỹп-çаппа типĕ курăк çунтарнăшăн тата территорие ăпăр-тапăрпа хыт хураран тасатманшăн штраф тỹлеттереççĕ:

. уйрăм çынсене - 2 пинрен пуçласа 3 пин тенкĕ таран;

. должноçри çынсене - 6-15 пин тенкĕ;

. предпринимательсене - 20-30 пин тенкĕ;

. юридици сăпачĕсене - 150-200 пин тенкĕ;

çирĕплетнĕ ятарлă пушара хирĕçле режим вăхăтĕнче:

. уйрăм çынсене - 2-4 пин тенкĕ;

. должноçри çынсене - 15-30 пин;

. предпринимательсене - 30-40 пин;

. юридици сăпачĕсене - 200-400 пин тенкĕ.