Майăн 12-мĕшĕнче Чăваш Республикин Министрсен Кабинечĕн председатель çумĕ - вĕренỹпе çамрăксен политикин министрĕ Алла Салаева, республикăри "Чăваш Енри хĕрарăмсен союзĕ" обществăлла организацийĕн председателĕ Наталья Николаева районта ĕçлĕ визитпа пулчĕç.

Хуларинчен пĕртте кая мар

Ĕçлĕ çулçỹреве хăнасем Хĕрлĕ Чутай шкулĕнчен пуçларĕç. Малтанах вĕсем шкул столовăйĕнчи лару-тăрупа паллашрĕç. Кунта ачасене пахалăхлă апатпа тивĕçтерни пирки шкулпа 7-мĕш класăн ашшĕ-амăш комитечĕсен председателĕсем Алефтина Дадюковапа Надежда Столярова палăртрĕç. Çавăн пекех уйрăм ашшĕ-амăшне апат пахалăхне палăртса хунă кун кăна сăнама май пурри пăшăрхантарать, ытти кунсенче тĕрĕслеме те чăрмавсене пĕтерме ыйтрĕç вĕсем. 2013 çулта столовăй оборудованине çĕнетнине пула пахалăхлă апатпа тивĕçтерме пĕтĕм условисем çителĕклине шкул директорĕ Вероника Архипова çирĕплетрĕ. Алла Салаева кулленех апат пахалăхне пысăк тимлĕх уйăрма асăрхаттарчĕ.

Мероприятие пухăннисем шкулти "Точка роста" центрта та пулса курчĕç. Кунта ачасем техника, гуманитари тата цифра енĕпе пĕлỹ илеççĕ. Алла Салаева робототехника кружокне çỹрекенсемпе те калаçрĕ. Çавăн пекех хăнасем шкулта хатĕрленĕ чăваш эрешĕпе Хĕрлĕ Чутай тумĕн куравĕпе паллашрĕç.

Унтан шкулăн акт залĕнче районти вĕренỹ тытăмĕн аталану векторĕсем енĕпе семинар-канашлу иртрĕ. Пухăннисем умĕнче район администрацийĕн пуçлăхĕ Иван Михопаров патшалăх тата Чăваш Республикин Пуçлăхĕ Олег Николаев нумай пулăшнипе районти шкулсемпе ача сачĕсем çĕнелсе пынине палăртрĕ, ĕçлеме условисем пулнă май учительсене ачасен вĕренỹ шайне ỹстерме чĕнсе каларĕ.

Савăнăçлă лару-тăрура вĕренỹ сферинче тăрăшакансене Чăваш Республикин Вĕренỹ тата çамрăксен политикин министерствин Хисеп грамотине парса саламларĕç. Çак хисепе "Хĕвел" ача садĕнче воспитательте вăй хуракан Надежда Егорова (педагогикăри стажĕ - 18 çул) тивĕçрĕ. Çавăн пекех асăннă хисеп хутне Мăн Этмен шкулĕн директорĕ Анатолий Ейков (педагогикăри стажĕ - 32 çул), Атнар шкулĕнче акăлчан чĕлхине вĕрентекен Нина Зайцева (24 çул) илме тивĕç пулчĕç. Чăваш Республикин Вĕренỹ тата çамрăксен политикин министерствин Тав сăмахне тивĕçнисен йышĕнче - райадминистрацин вĕренỹ пайĕн ресурспа тивĕçтерекен центрĕн заведующийĕ Петр Ванягин, Çĕн Атикасси шкулĕн директорĕ Лариса Бармина, район администрацийĕн вĕренỹ пайĕнче водительте тăрăшакан Владимир Кудряшов, "Пучах" ача сачĕн заведующийĕн тивĕçне пурнăçлакан Галина Николаева, Мăн Этмен шкулĕнче кĕçĕн классене вĕрентекен Надежда Фадеева, Мишеркасси шкулĕ çумĕнчи шкул çулне çитменнисен ушкăнĕн воспитателĕ Алина Ястребова.

Эпĕ - хĕрарăм

"Çын тата çутçанталăк" халăх музейĕнче Алла Салаевапа Наталья Николаева çавра сĕтел хушшинче районти активлă хĕрарăмсемпе тĕл пулчĕç. "Чăваш Енри хĕрарăмсен союзĕ" обществăлла организацин вырăнти уйрăмĕн председателĕ Ирина Егорова хĕрарăм пĕлтерĕшĕ пирки тата районти музейăн тĕп управçинче тăрăшакан, пилĕк ача амăшĕ Лариса Сядайкина çемье хаклăхĕ çинчен сăмах хускатрĕç. Наталья Николаева районта пурăнакансене республикăри "Эпĕ - хĕрарăм" конкурса хутшăнма чĕнсе каларĕ. Алла Леонидовна та Чутай хĕрарăмĕсене хастартарах пулма, конкурса активлă хутшăнма сĕнчĕ.

Район аталанăвĕшĕн

Атнар шкулĕнче хăнасем район Пухăвĕн депутачĕсемпе тата ял тăрăхĕсен пуçлăхĕсемпе тĕл
 пулчĕç, районăн 2021-2025 çулсенчи социаллă пурнăçпа экономика аталанăвне сỹтсе яврĕç. Н.Артемьев, А.Степанов, В.Романов депутатсем, А.Порфирьев, И.Живоев тата Н.Ельцова хăйсене пăшăрхантаракан ыйтусене хускатрĕç.

"Уйăпсем те шăнса пĕтрĕç"

Кăçал Чăваш Енре - Сăр тата Хусан чиккисене тунисен паттăрлăхне халалланă çулталăкĕ. Çакна тĕпе хурса иртнĕ юнкун Чăваш Республикин Пуçлăхĕ Олег Николаев сĕннипе район çыннисем Культура çуртĕнче Çеçпĕл ячĕпе хисепленекен Чăваш çамрăксен театрĕн артисчĕсем лартса панă "Уйăпсем те шăнса пĕтрĕç" спектакле тỹлевсĕр курма пултарчĕç. Куракансем артистсен пултарулăхне пысăка хурса хакларĕç, иртнĕ йывăр çулсене куç умне кăларса куççульленчĕç те...

Хамăр корр.