Вĕренỹри, спортри çитĕнĕвĕсене кура çĕршыври çамрăксене "Артекра" пухасси йăлана кĕчĕ. Унта тĕрлĕ регионти яшсемпе хĕрсем пĕрле пухăнса акцисене, конкурссене, ăмăртусене хутшăнаççĕ, унпа пĕрлех çĕнĕ тус-тантăшсем тупаççĕ. Районтан та çулсерен асăннă центра çамрăксем кайса кураççĕ. Хальхинче вара çак чыса Хĕрлĕ Чутай шкулĕнче 11-мĕш класра вĕренекен, "Хастар" физкультурăпа спорт комплексĕн ишевçĕсен уйрăмне çỹрекен Мария Аливанкина тивĕçнĕ. Декабрĕн 27-мĕшĕнчех çула тухнă вăл, ыран тăван тăрăха та çитĕ ĕнтĕ.

Çамрăксен кану центрĕнче вăхăт кашнийĕншĕн сисĕнмесĕрех иртет. Кунта кунсерен тĕрлĕ спорт ăмăртăвĕсем иртеççĕ. Вĕсенчен пĕрине те ирттермен Мария, ишевçĕсен ăмăртăвĕнче палăрма та пултарнă вăл. Хĕрсем хушшинче ирĕклĕ майпа ишсе 50 метр тăршшĕ дистанцие пĕрремĕш парăнтарнă. Суйланнă ăмăртусенче хĕр чи лайăх кăтарту кăтартнă, ылтăн медале тивĕçнĕ. Эстафета ишевĕнче вара, унта Мария та пулнă, команда иккĕмĕш вырăн çĕнсе илнĕ.

Палăртма кăмăллă, Мария - ишессипе хĕрсемпе хĕрарăмсем хушшинче районăн абсолютлă чемпионĕ тата рекордсменĕ. Вăл - республика шайĕнче акватлон енĕпе иртнĕ ăмăртусен призерĕ. Унăн ку енĕпе пĕрремĕш спорт разрячĕ пур. Акватлон, триатлон, ишесси тата çăмăл атлетика илĕртеççĕ ăна. Пултаруллă наставникĕсем - Юрий Столяров тренер-преподавателĕ тата Эдуард Романов физкультура учителĕ - çитĕнỹ çулĕпе утма пулăшаççĕ ăна. Паллах, ашшĕ-амăшĕ те хавхалантарса пыраççĕ пикене. Вăл аслисен кашни сăмахне ăша хывать, пуçланă ĕçе тĕплĕн пурнăçлать. Ахальтен мар Мария мĕн 1-мĕш класран тытăнса "5" паллăсемпе кăна вĕренет. Çулсерен предмет олимпиадисене, литература конкурсĕсене, акцисене, интеллектуаллă вăйăсене, унсăр пуçне шкулта, районта иртекен культура мероприятийĕсене хутшăнать, вĕсене ертсе пырать. Музыкăпа та интересленет хĕр, ăна тăтăшах сцена çинче куратпăр. Хăйĕн шăпчăк евĕр сассипе пурне те тыткăнлать вăл. Пурин те унран ырă тĕслĕх илесчĕ.

А.ВАСЮКОВА.