"Тавтапуç тухтăр! Тавтапуç медсестра!" акци шайĕнче иртнĕ çул республикăри медицина организацийĕсенче ĕçлекенсем тĕлĕшпе çынсенчен тав сăмахĕсене пухнă. Сывлăх сыхлавĕн министерствине çынсем 1206 медицина ĕçченне ырласа 32 пине яхăн тав сăмахĕ çитернĕ.

Çак кунсенче "Тавтапуç тухтăр! Тавтапуç медсестра!" акци шайĕнче "Халăх хисепĕ" обществăлла наградăна 100 лауреат тивĕçни паллă пулчĕ. Пациентсен хисепĕпе тав сăмахне тивĕçнисем хушшинче районти тĕп больницăн медицина ĕçченĕ пурри те савăнтарать. Районта пурăнакансенчен нумайăшĕ реанимаци уйрăмĕн медицина сестрине Юлия Пирогована тав сăмахĕ каланă.

Юлия Федоровна Кашинăри медицина училищинче ăс пухнă. Унтанпа 33 çул ĕнтĕ медицина сестринче тăрăшать. Районти тĕп больницăра 1996 çултанпа ĕçлет. Малтан терапи, унтан хирурги уйрăмĕсенче тăрăшнă вăл. 16 çула яхăн ĕнтĕ йывăр чирлисене ура çине тăратассипе реанимаци уйрăмĕнче вăй хурать вăл. Çăмăл мар ĕçре сывалнă çынсен тав сăмахне илтсен чунĕ питĕ савăннине палăртать Юлия Федоровна.

М.МАМУТКИНА.