Ĕнер район депутачĕсен Пухăвĕн черетлĕ ларăвĕ иртнĕ. Унăн ĕçне Чăваш Республикин Патшалăх Канашĕн депутачĕ Владимир Мурайкин, район пуçлăхĕ Владимир Ярайкин, район администрацийĕн пуçлăхĕ Иван Михопаров хутшăннă. Район Пухăвĕн депутачĕсем, райадминистрацин тĕрлĕ тытăм ертỹçисем тата ял тăрăхĕсен пуçлăхĕсем кун йĕркинче палăртнă виçĕ ыйтăва сỹтсе явнă. Район администрацийĕн ĕçĕсен управляющийĕ Светлана Князькова муниципаллă округ тăвассипе çыхăннă ыйтăва уçăмлатса панă. Райадминистрацин финанс пайĕн ертỹçи Ольга Музякова кăçал тата çитес икĕ çулта ял тăрăхĕсем хушшинче бюджет трансферĕсене уйăрмалли методикипе расчечĕсене çирĕплетессипе çыхăннă ыйтупа тухса калаçнă. Районти полици уйрăмĕн начальникĕ Антон Комиссаров оперативлă службăн иртнĕ çулхи ĕç-хĕлне пĕтĕмлетнĕ.

Район ертỹлĕхĕ ларăва хаваслă пулăмпа вĕçленĕ. Çĕн Атикассинчи вăтам шкулта вырăс чĕлхипе литературине вĕрентекен Ираида Леонидовна Евсеевана тата Мăн Этменти вăтам шкулта чăваш чĕлхипе литературине вĕрентекен Татьяна Васильевна Горбунована "Раççей Федерацийĕн воспитанипе çутĕçĕн хисеплĕ ĕçченĕ" кăкăр паллипе чысланă.

М.МАМУТКИНА.