Çулла канма вăхăт çук, уйрăмах çĕр ĕçченĕн. Пĕр ĕçне туса пĕтерейместĕн, теприне пуçăнмалла. Районти хуçалăхсенче те çавах. Выльăх апатне хатĕрле- нипе пĕрлех вырмана та тухмалла. Çанталăкĕ кăна ура хурать-ха. Апла пулин те "Нива" ялхуçалăх предприятийĕн комбайнĕсене уй-хирте курма пулать. Вĕсем тĕрĕслев витĕр тухнă ĕнтĕ. Районти чи пысăк ялхуçалăх предприятийĕн - "Коминтернăн" - уй-хир карапĕсем те юсавлă. Вĕсене августăн 1-мĕшĕнче Хĕрлĕ Чутайпа Çĕмĕрле районĕсен патшалăх техника асăрхавĕн инспекцийĕн аслă инспекторĕ Николай Петров тĕрĕсленĕ. Вăл çак кун районти темиçе хуçалăха та çитнĕ.

Аса илтеретпĕр, кăçал пĕтĕмпе пĕрчĕллĕ тата пăрçа йышши культурăсене 4358 гектар çинчен пуçтарса кĕртмелле. Çак ĕçе 14 комбайн пурнăçлĕ.

Уй-хирте техника шавĕ тăма пуçланă май районта, пĕтĕм республикăри пекех, июлĕн 22-мĕшĕнче "Трактор" операци пуçланнă. Вăл августăн 22-мĕшĕччен пырать. Асăннă тапхăрта патшалăх техника асăрхавĕн инспекторĕсем, полици сотрудникĕсем тракторсене, хăй тĕллĕн çỹрекен ытти техникăна тата вĕсен прицепĕсене, докуменчĕсене тĕрĕслĕç.

Мотоблок хуçисен те правилăсене пăхăнас пулать. Пурте усă куракан çул çине асăннă техникăпа тухма юраманнине асра тытмалла. Унпа кил таврашĕнчи, пахчари ĕçсене пурнăçланă чух усă курмалла.

А.АЛЕКСЕЕВА.