Пурте пĕлетпĕр ĕнтĕ, кăçал пирĕн районта Республика кунĕ иртмелле. Коронавирус инфекцийĕсарăлассипе çыхăннă эпидеми лару-тăрăвне пула уяв мероприятийĕсене ирттерессине июнĕн 24-мĕшĕнчен август уйăхне куçарнă пулин те, район центрне çĕнетес, тирпей-илем кĕртес ĕçсем малалла пыраççĕ.
Çак кунсенче район администрацийĕн тата Хĕрлĕ Чутай ял тăрăхĕн ĕçченĕсем тăрăшнипе чылай çĕрте илемлĕ чечексем лартнă клумбăсем курăнма пуçларĕç. Хĕр лĕ Чутай ял тăрăхĕн администрацийĕнчен пĕлтернĕ тăрăх, çак чечексене Республика кунне хатĕрленсе ирттерме уйăрнă укçапа туяннă, хальлĕхе - виçĕ пине яхăн хунав. Чечексемпе район администрацийĕн çурчĕ, "Я люблю Красные Четаи" арт-объект, район центрĕнчен тухса кайнă çĕрте вырнаçтарнă çĕнĕ стела умĕсене илемлетнĕ. Çавăн пекех автовокзал патĕнчен инçех мар вырнаçнă парикмахерски умне те хăйне евĕр клумбăсем тунă.
Районти Культура çурчĕ умĕнчи тата ун çывăхĕнчи строительство ĕçĕсене вĕçлесен унта та чечек клумбисем тăвĕç.
Район центрĕ çĕнелсе тата чечекленсе пынине курма питĕ кăмăллă. Пирĕн çак илеме упрама пĕлесчĕ кăна.