Çуркунне кунран-кун вăй илсе пырать. Çавна май ейỹ тапхăрĕ мĕнле иртсе каясси шухăшлаттарать. Уйрăмах шыв çыранран тухса кайса юханшыв çывăхĕнче пурăнакансен пурлăхне пысăк сиен кỹме пултарасран шикленмелле. Çакна шута илсех ĕнтĕ кăçал та ейỹ тапхăрне инкексĕр ирттерсе ярас тĕллевпе тивĕçлĕ мерăсем йышăнма округ пуçлăхĕн мартăн 10-мĕшĕнчи йышăнăвĕпе ятарлă комисси туса хунă, унта тĕрлĕ сферăра тăрăшакан яваплă çынсене кĕртнĕ.

Комисси членĕсем ĕçе пуçăннă ĕнтĕ, тăтăшах тĕрĕслеве тухаççĕ, шыв-шур сиен кỹме пултаракан вырăнсене тимлĕхре тытаççĕ, гидротехника сооруженийĕсене, каçăсемпе пăрăхсене пăхсах тăраççĕ. Округ администрацийĕн мобилизаци хатĕрленĕвĕпе ятарлă программăсен пайĕнчен пĕлтернĕ тăрăх, шыв илес хăрушлăх зонине çак ялсем кĕреççĕ: Пĕрремĕш Липовка - 2 кил-хуçалăх, Шулю - 5, Мишеркасси - 6, Утаркасси - 9.

Юлашки çулсенче шыв-шур хĕрлĕчутайсене шар кăтартманччĕ. Апла пулин те сыхăлăх кирлех. Кăçал та ку тапхăр пĕр инкексĕр, йĕркеллех иртсе каясса шанатпăр.