Кашни çыннăн пурнăçра пĕлтерĕшлĕ утăм тума тивет, çав утăмран унăн малашлăхĕ килет. Анчах ун патне çитиччен ыттисене еплерех утса тухмалла-ха? Чăваш кĕнеке издательствинче кун çути курнă çĕнĕ кăларăм шăпах çакăн çинчен каласа парать. «Вуникĕ утăм» ятлă вăл, авторĕ – Элтияр Александров. Редакторĕ – Ольга Федорова, ӳнерçи – Сергей Орлов. Кăларăма прозăллă сăвăсем кĕнĕ. Чăваш мифологине тĕпчекен çамрăк ăсчах шухăшĕсене кура вĕсене тĕрлĕ сыпăка уйăрнă. Хайлав пуххи мифологи сăввисенчен пуçланать.

Чăваш халăхĕн авалхи пурнăçĕ пуян пулнине «Чăваш халӑх кун-çулӗнчен» ятлӑ пая кӗнӗ прозӑллӑ сӑвӑсем ӗнентереççӗ. Автор вӗсенче Улах, Акатуй, Сӗрен йӑлисене уçса парать, Пӑлхар хулипе паллаштарать тата ытти саманта тимлӗх уйӑрать. «…Çак Акатуй йăли пуян та аслă. Ун никĕсне чăваш туптанă пиншер çул. Ку йăлара эпир кĕтӳç те паттăр, ку йăлара эпир çĕр ĕçĕпе маттур. Çак йăлара хуçалăхсем те чаплă. Карта тулли тăраççĕ выльăхсем. Ку йăлара чăваш хăюллă çарçă, парăнтарать вăл пĕтĕм тĕнчене. Çунатлă лашине вăл утланать те хĕçне йăтса вĕçет хирсемпеле. Ун аллинче – авса хытарнă ухă, йĕппи персен тивет хурчка куçне. Çак сăнара тӳпе те кăтартать-мĕн!..»

Тĕплĕнрех - "Пирĕн пурнăç" хаçатра.