Çанталăк сивĕтсе пынă май Раççейĕн Чрезвычайлă лару-тăру министерстви кăмакасемпе тĕрĕс усă курманни инкек патне çитерме пултарнине аса илтерет - шăпах çак сăлтава пула уйрăм çуртсенче пушарсем ытларах тухаççĕ.

Кил-çуртри ăшă хăрушсăр пултăр тесен çак ансат пра-вилăсене пăхăнмалла:

. Хутса ăшăтмалли тапхăр пуçланиччен кăмакана тĕрĕслемелле. Кирпĕчсем хушшинче тата тĕтĕм çулĕнче çурăксем пулмалла мар. Тĕтĕм çулне хăрăмран тасатмалла. Пухăнса тăнă хăрăм пушар сăлтавĕ пулма пултарать.

. Кăмака хутмалли вырăнта тимĕр татки сармалла! Унăн виçи 50х70 сантиметртан кая мар пулмалла. Вăл урайне ỹкнĕ кăмрăксенчен сыхлать.

. Кăмакана хĕрсе кайичченех хутма кирлĕ мар. Кунне 2-3 хут хутни лайăхрах.

. Кăмака питлĕхне вăхăтра хупмалла. Кăвар сỹниччен тăхтамалла.

. Кăмакари вут хăвăртрах илтĕр тесе бензинпа, краççынпа, расворительсемпе усă курмалла мар.

. Хутнă кăмакана нихăçан та тимлĕхсĕр ан хăварăр - уйрăмах каçа хирĕç. Çак ĕçе ачасене пурнăçлама ан шанăр.

. Кăмакана уçă алăкпа хутма юрамасть.

Округра пурăнакансене кăмака вырнаçтарнă, тунă тата унпа усă курнă чух пушар хăрушсăрлăхĕн правилисене пăхăнма, вут чĕртсен асăрхануллă пулма чĕнсе калатăп. Пушара сỹнтерме мар, асăрхаттарма çăмăлрах.

Енчен те пушар тухсан е асăрхасан тăхтаса тăмасăр сотовăй телефонпа 101 е 112 номерсемпе шăнкăравласа пĕлтерĕр.

Алексей ЯРАБАЕВ, пушар асăрхавĕпе профилактика пайĕн начальникĕ