Пушара пула çын пĕр самантрах нимсĕр-мĕнсĕр тăрса юлма пултарать. Тимлĕхсĕр пулни пысăк инкек патне çитерет. Çавна май хутса ăшăтмалли тапхăрта уйрăмах тимлĕ пулмалла. Вут-çулăм кил-çуртра кăна мар, мунчасенче те алхасма пултарать. Статистика кăтартнă тăрăх, округра çулталăк пуçланнăранпа "хĕрлĕ автан" 14 хутчен хуçаланнине регистрацилерĕмĕр. Пушарсен сăлтавĕ ытларах чухне (36 проценчĕ) кăмакасен юсавсăрлăхĕпе, вĕсемпе тĕрĕс усă курманнипе çыхăннă. Çавна май мунчасем ытларах çунаççĕ те.

Пушартан сыхланас тесен ансат правилăсене пăхăнмалла. Кăмакасене хĕрсе кайма памалла мар. Кăмакасенчи температура (топливник) 1000-рен те иртме пултарать, тĕтĕм çулĕнче - 600-тен те иртет. Çакă çунакан материалтан та, кăмакан стени хулăнăшĕнчен те килет.

Вут-çулăм кăмакари çурăк вырăнсем урлă та алхасма пултарать. Çавăнпа та кăмака купалас ĕçе специалиста шанмалла. Хутса ăшăтмали тапхăр пуçланиччен кăмакасен юсавлăхне тĕрĕслени те ытлашши пулмĕ. Тĕтĕм пăрăхĕсене тата кăмака стенисене шуратмалла, тĕтĕм çулĕсене хăрăмран тасатмалла, кăмака алăкĕ патне тимĕр татки сармалла. Хутнă кăмакана тимлĕхсĕр хăварма, çак ĕçе ачасене шанма кирлĕ мар. Кăмакана вут илтернĕ чухне бензинпа, краççынпа тата çăмăл вут илме пултаракан ытти хутăшсемпе усă курма юрамасть. Çунса пĕтнĕ кĕле те çурт çывăхĕнче хăварма кирлĕ мар.

Хисеплĕ граждансем, кăмакасемпе асăрхануллă пулăр, вĕсен юсавлăхне тĕрĕслесех тăрăр.

Алексей ЯРАБАЕВ, пушар асăрхавĕпе профилактика пайĕн начальникĕ