Сыснасен Африка мурне çĕршывăн тĕрлĕ регионĕсенче тупса палăртни, унран асăрханмалли пирки эпир час-часах çыркаласа тăтăмăр. Акă çак хăрушă чир халĕ пирĕн республикăна та хир сыснисене пула килсе лекрĕ. Тĕплĕнрех каласан, чир паллисене Пăрачкав участокĕн лесничествин территорийĕнче тупнă вилнĕ хир сыснисен генетика материалĕсем çирĕплетсе панă. ЧР Патшалăх ветеринари служби пĕлтернĕ тăрăх, хăрушă чире сарăлма парас мар тесе сысна виллисене çунтарнă, вĕсем пулнă вырăнсене типĕ хлорлă извеçпе сапнă.

Сыснасен Африка мурĕ-пе çыхăннă лару-тăру пирки республика Правительствин чирпе кĕрешекен комиссин черетсĕр ларăвĕ пулнă. Унта чир республика территорине килсе ан лектĕр, ан сарăлтăр тесе сысна усракан хуçалăхсен сыснасене малашне хупă майсенче тытмаллине, фермăсен территорийĕсене икĕ метр çỹллĕш картапа тытса çавăрмаллине, дизбарьерсем йĕркелемеллине тата ытти пĕлтерĕшлĕ мероприятисене пурнăçламаллине палăртнă. Çавăн пекех ЧР Пуçлăхĕн йышăнăвĕпе хăрушă чире тупнă территорие карантина илнĕ, унта вăхăтлăха сунара çỹреме, çутçанталăкпа усă курма чарнă, республикăри ытти территорисенче вара хир сыснисен шутне чакарассипе ĕçлеме йышăннă.

Лев ГУЩИН, Хĕрлĕ Чутайри чĕрчунсен чирĕсемпе кĕрешекен станци начальникĕ:

- Палăртмалла, республикăра сыснасен Африка мурне тупса палăртнă май халĕ власть органĕсемпе организацисем чире сарăлма парас мар тесе тивĕçлĕ мерăсем йышăнаççĕ. Районта пурăнакансен питех пăлханса ỹкме кирлĕ мар. Мĕншĕн тесен чир паллисене пирĕн районтан аякра тупнă, çавăнпа пирĕн район хăрушлăх зонине кĕмест. Сыснасене, вĕсен какайне предприятисенчен те, халăхран та туртса илмеççĕ. Çапах та сыснасене çирĕп йĕркене пăхăнса усрама, вĕсене куçарнă е сутнă чухне ветеринари докуменчĕсемпе усă курма сĕнетпĕр. Çавăн пекех сыснасем массăллă чирленĕ е вилнĕ тĕслĕхсем пулсан районти ветеринари учрежденине пĕлтерме ыйтатпăр.

А.ЗАМУТКИНА.