Январĕн 12-мĕшĕнче Хĕрлĕ Чутай салинче пурăнакан Ольга Ивановна Патрикеева хăйĕн 90 çулхи юбилейне кĕтсе илнĕ. Çак ятпа вăл Раççей Президенчĕн Владимир Путинăн саламлă Çырăвне, çывăх тăванĕсемпе хăнасенчен ăшă сăмахсемпе саламсем йышăннă.

Пурнăçĕ çăмăл килмен кинемейĕн. Вăл ытти çамрăксем пекех Çĕнтерỹ кунне çывхартас тесе ырми-канми тăрăшнă, тĕрлĕ йывăрлăхсене çĕнтерсе малалла пурăнма ăнтăлнă. Пилĕк авмасăр мĕнле пулĕ-ха. Ачи-пăчине ура çине тăратмалла, кил-çуртне пăхмалла. - Ман çулсенче утса çỹрени усăллă. Çавăнпа та эпĕ пĕр вырăнта ларма юратмастăп. Кунне, кăмăл пулсан, хам килтен пуçласа центра çити икĕ хутчен те кайса килетĕп. Килти пур ĕçе те хамах тăватăп. Çуллахи кунсенче сад-пахчара чаваланатăп. Хам алăпа туса илнĕ пахча çимĕç, улма-çырла тухăçĕпе çулсерен савăнтараççĕ. Ачасене, вĕсем манран аякра пурăнаççĕ пулин те, вăй пур таран пахалăхлă çимĕçсемпе тивĕçтерме тăрăшатăп. Ывăлăмпа хĕрĕм май тупăнсанах тăван киле килсе каяççĕ, кил таврашĕнче пулăшаççĕ, - каласа парать Ольга Ивановна. - Эпĕ хамăн 90 çулхи юбилее кĕтсе илеетĕп тесе шухăш-ламан та. Халĕ 100 çула çитиччен пурăнасчĕ. Аслă ỹсĕмри çынсем малашлăх валли плансем туни, телейлĕ пурăнни, кашни кунпа савăнма пĕлни лайăх. Пирĕн, çамрăксен, вĕсенчен вĕренмелли нумай.

А.ВАСЮКОВА.