Июнĕн 5-мĕшĕнче Анат Чутайра пурăнакан Агапия Сергеевна Федотова хăйĕн 90 çулхи юбилейне ачисемпе мăнукĕсен тата кĕçĕн мăнукĕсен, тăванĕсен йышĕнче кĕтсе илнĕ, хăнасенчен Раççей Президенчĕн саламлă Çырăвне тивĕçнĕ.

Нушине сахал мар курнă ватă. Çĕнтерĕве çывхартас тесе çамрăклах ĕçе пуçăннă Атнарта çуралса ỹснĕ хĕр. Йывăрлăхсене парăнман, пĕр ĕçрен те хăраса тăман, тус-тантăшĕсемпе колхозра та, вăрманта та ĕçленĕ. Николай Ивановичпа çемье çавăрсан та пурнăçне колхозпах çыхăнтарнă вăл. Агапия Сергеевна мăшăрĕпе виçĕ ачана, икĕ хĕрпе пĕр ывăла, кун çути парнеленĕ, вĕсене ура çине тăратнă.

Вашават та ырă кăмăллăскер, çулĕсене пăхмасăр вăй-хăват, çивĕч ăс-тăн упраса хăварнă. Вăл паян пĕччен пурăнать пулин те кил таврашĕнче, сад-пахчара ĕçлеме ỹркенмест. Пур ĕç те унăн аллинче вĕрет темелле. Ун патне ачисем килсех çỹреççĕ, кил хуçалăхĕнче пулăшаççĕ, тимлĕх уйăрсах тăраççĕ, унпа мухтанаççĕ. Паянхи кун ветеран пурнăç çине савăк куçпа пăхать, ачисен, 6 мăнукĕн тата 5 кĕçĕн мăнукĕн çитĕнĕвĕсемпе савăнать.

А.ВАСЮКОВА.