Июлĕн 1-мĕшĕнчен пуçласа Чăваш Енре çĕнелнĕ пуçаруллă бюд-жет программине хутшăнма заявкăсем йышăнма пуçланă. "Эпир çул-йĕрсене анлăлатрăмăр, укçа-тенке пысăклатрăмăр, çавна май пурнăçланă проектсен шучĕ те ỹсĕ. Çынсем сĕннĕ "Манăн кил картишĕ" тата "Ачасемпе çамрăксен тĕнчи" çĕнĕ приоритетсем хушăнчĕç.

Иван МИХОПАРОВ, муниципаллă округ пуçлăхĕ:

- Июлĕн 1-мĕшĕнчен республикăра 2026 çул валли пуçару бюджечĕн программи ĕçлеме тытăнчĕ. Чăваш Ен Пуçлăхĕн Олег Николаевăн хушăвĕпе унта пĕлтерĕшлĕ улшăнусем кĕртнĕ. Программа анлăланнă. Унта икĕ ен хушăннă - "Манăн кил картишĕ" тата "Ачасемпе çамрăксен тĕнчи". Проектсене пурнăçа кĕртме ял çыннисене те явăçтарас пулать. Пĕлтерĕшлĕ çĕнĕлĕх: муниципалитетсенчен йышăнакан заявкăсен хисепне чикĕлемеççĕ. Çĕнĕ хаклав тытăмĕ халăх пуçарăвĕсене пулăшасси çине пусăм тăвать. Палăртмалла, программа ĕçлеме пуçланă-ранпа, 2019 çултанпа, округра 416 миллион тенкĕлĕх 417 пуçару проекчĕ пурнăçланнă. Кăçал кăна 125 миллион тенкĕлĕх хушма 65 проект пурнăçа кĕрет. Заявкăсене "Чувашия онлайн" платформăра августăн 14-мĕшĕччен йышăнаççĕ. Унтан, сентябрĕн 12-мĕшĕнчен пуçласа, Патшалăх пулăшăвĕсен порталĕнче уçă сасăлав пуçланать. Пĕтĕмлетĕве октябрь уйăхĕн вĕçĕнче тăваççĕ. Хастартарах пулăр, хăвăр пуçарăва сĕнĕр. Çапла майпа хамăр пурнăçа лайăхрах та хăтлăрах тăвăпăр.

Тĕплĕнрех - "Пирĕн пурнăç" хаçатра.