Иртнĕ шăматкун, апрель уйăхĕн 18-мĕшĕнче, Шупашкарти Трактор тăвакансен культура керменĕ кĕрлесе çеç тăчĕ. Ара, кунта хĕрлĕчутайсем уява пухăнчĕç. "Чавал" ентешлĕх йĕркеленнĕренпе 30 çул çитнĕ-çке. Пĕр-пĕрне тахçанах курман юлташ-пĕлĕшсем çак мероприятие васкарĕç. Уява пухăнакансене вара округри фольклор ушкăнĕсем илемлĕ юрă-ташăпа кĕтсе илчĕç.

Юрă-ташă тенĕрен, мероприятире вăл сахал мар пулчĕ. Хĕрлĕ Чутай çĕрĕ çинче ỹснĕ артистсем уяв сĕмне вăйлатрĕç çеç. Программăна "Сарпике" халăх ташă ансамблĕ пуçларĕ. Сăмах май, ăна Уйпуç ялĕнче çуралса ỹснĕ Алиса Лукина балетмейстер ертсе пырать. Унăн ушкăнĕ Раççей ша йĕнчи фестиваль-конкурссенче те тăтăшах палăрать.

Чи малтанах ентешлĕх председателĕ Владимир Савинкин пĕрлехи ĕçсем çинчен каласа кăтартрĕ. "Чавал" ентешлĕх хастарĕсем тăтăшах тĕрлĕ мероприятие хутшăнаççĕ е хăйсем йĕркелесе ирттереççĕ. Çав шутра - округри шкул ачисене литература анине тухма пулăшасси те, спорт енчен аталантарасси те, ятарлă çар операцине хутшăнакан ентешсем патне гуманитари пулăшăвĕ çитересси те, ытти те… Ĕç сахал мар. Пурте пĕрле тăрăшсан пĕтĕмпех пулать.

Ентешлĕх Канашĕн йышне те çирĕплетрĕç, унпа пурне те Владимир Савинкин паллаштарчĕ.

Тĕплĕнрех - "Пирĕн пурнăç" хаçатра.