Хӗрлӗ Чутай салин историллĕ центрĕ куҫ умĕнчех илемленсе пырать. Юлашки ҫулсенче музей ҫурчӗпе кивӗ шкул ҫӗнелчӗҫ, юнашар ача-пӑча лапамӗ пур. Чиркӳ патӗнчи пӗве округра пурӑнакансен тата хӑнасен юратнӑ вырӑнӗ пулма та ӗлкӗрчӗ: ҫынсем васкамасăр шыв ҫийӗн уҫӑлса ҫӳреҫҫӗ, илемлӗ вырăнпа киленеҫҫӗ, сӑн ӳкерӗнеҫҫӗ, чунпа канаҫҫӗ...
Кунта шыв патне анмалли пирс, "Юрату кӗперӗ", сулхӑнра лармашкăн пергол, округ ҫинчен пĕлтерекен стендсем пур, хунарсемпе саксем вырнаçтарнă, брусчатка сарнӑ, чечексем илем кӳреҫҫӗ. Ҫак кунсенче пирĕн ентешӗн, чӑваш ҫырулӑхне пуçарса яраканĕн Ермей Рожанскин бюсчĕ те кунти вырӑна пуянлатрӗ.
Асӑннӑ вырӑнта ӗҫсем малалла пыраҫҫӗ, пӗтӗмпех Чӑваш Республикин 2025-2030 ҫулчченхи социаллӑ пурнӑҫпа экономика аталанӑвӗн Комплекслӑ программипе килĕшӳллĕн пурнӑҫланаҫҫӗ.
Июлӗн 27-мĕшĕнче округ администрацийĕн пуҫлӑхӗ Иван Михопаров пуҫарнипе вырӑнта пурӑнакансемпе тӗрлӗ общество организацийӗсен ертӳçисем тӗл пулса тунӑ объектсене упрас тӗллевпе кулленех асӑрхав йĕркелеме йышӑнчӗҫ.
Хамӑр валли туса панӑ илеме, ырлӑха упрама, хаклама хӑнӑхасчӗ, киревсĕр ӗҫ тунине курсан - асăрхаттармасăр иртес марччӗ.