Кăçал хĕле Пĕтĕм тĕнчери хĕрарăмсен кунĕнче, мартăн 8-мĕшĕнче, ăсатрăмăр. Хĕвелĕ те çак кун çуркунне вăй илсе пынине систерсе кунĕпех хĕртсе пăхрĕ. Район центрĕнче янăракан юрă-кĕвĕ, çỹçеллĕ тутăр çыхнă, сăхман, пустав тăхăннă Чутай хĕрĕсем, ватти-вĕтти, тĕрлĕ тĕслĕ хăюсемпе илемлетнĕ лашасемпе хыçлă çунасем, юмахсенчи тĕрлĕ сăнарсем уяв сумне хăпартрĕç.

Уяв районти Клубсен пĕрлештернĕ тытăмĕнче тăрăшакансем хĕл ăсатăвне халалласа йĕркеленĕ театрализациленĕ кăтартупа пуçланчĕ. Çавăн пекех уява пухăннисене ял тăрăхĕсен пултарулăх коллективĕсем юрă-ташăпа савăнтарчĕç. Уяв концерчĕн пĕтĕмлетĕвĕсем тăрăх "Чи лайăх пултарулăх ушкăнĕ" номинацире Пантьăк ял тăрăхĕн коллективĕ палăрчĕ, Тралькасси ял тăрăхĕ - иккĕмĕш, Хĕрлĕ Чутай ял тăрăхĕ - виççĕмĕш.

Район центрĕн тĕп урамĕпе ял тăрăхĕсенчен çитнĕ капăр лашасемпе лавсем, автомобильсем, тĕрлĕ техника иртни уйрăмах куракансен кăмăлне кайрĕ. Хыçлă çунасем çинче ларакансем хушшинче тĕрлĕ сăнарсене курма май пулчĕ. Ял тăрăхĕсем Ырă ĕç тăвакансен тата Иван Яковлев çулталăкĕсене сăнласа парас тесе чунтан тăрăшни сисĕнчĕ.

Кỹлнĕ лашасен конкурсĕнче кăçал Тралькасси ял тăрăхĕ мала тухрĕ, иккĕмĕш вырăн Хĕрлĕ Чутай ял тăрăхĕ йышăнчĕ, виççĕмĕш - Атнар ял тăрăхĕ. Хĕл ăсатăвне кỹлнĕ лашасемпе тухнисене пурне те парнепе хавхалантарчĕç. Çавăн пекех уява лайăх хатĕрленнĕшĕн "Хĕвел" ача садне палăртрĕç, парне пачĕç. Кунти ĕçченсем темиçе çул хушши ĕнтĕ куракансене хăйсен иксĕлми пултарулăхĕпе савăнтараççĕ.

Уявра кашниех хăйне майлă киленỹ тупрĕ. Спортпа туслисем тĕрлĕ ăмăртусенче тупăшрĕç, асли-семпе ачасем вăйă картине тăчĕç, сцена çинчи пултарулăх ушкăнĕсене курса савăнчĕç.

А.ВАСЮКОВА.