Кашни çын шкул пĕтерсен хăйĕн пурнăçне хăш профессипе çыхăнтарасси пирки шухăшлать, тĕплĕ суйлав умĕнче тăрать. Пĕрисем ачаллах çакна палăртса хураççĕ, ĕмĕтленеççĕ, ăна пурнăçа кĕртме ăнтăлаççĕ. Теприсем ним шухăшласа тăмасăр ашшĕ-амăшĕн çулĕпех кайма тĕв тăваççĕ. Çакă, паллах, савăнтарать. Районти учреждени-организацисенче те кун пеккисем çук мар. Паян сире, вулаканăмăрсем, медицинăра тăрăшакансем пирки каласа кăтартасшăн. Хамăр районти больницăра тăрăшакан шур халатлă ĕçченсен ачисем ашшĕ-амăшĕн çулне суйласа илнĕ тĕслĕхсем сахал мар иккен. Вĕсемпе паллашар-ха, эппин...

Районти тĕп больницăн коллективĕ пĕчĕк мар: кунта 32 тухтăр, 96 медицина сестри тата 85 ытти ĕçчен тăрăшать. Тухтăрсен ачисем çак профессиех кăмăлланине ырламалла. Вĕсем ашшĕ-амăшĕн ырă тĕслĕхне курса хăйсен пурнăçне çын сывлăхне упрас, чирлисене сыватас пархатарлă ĕçе халаллаççĕ. Медицина сестрисен ачисем те амăшĕн çулĕпе кайни сахал мар тĕл пулать. Малалла вĕсем пирки сăмах пырĕ.

. Людмила Кузьминична Кчеткова чылай çул райбольницăра терапевтра, тĕп тухтăрăн çумĕнче тăрăшрĕ. Унăн хĕрĕсем Елена тата Татьяна та тухтăр профессине алла илнĕ. Елена Сергеевна Матвеева та терапевтра тăрăшать, Татьяна Сергеевна Фондеркина та терапевт, тĕрлĕ диагностика та тăвать. Людмила Кузьминичнăн пĕртăванĕн хĕрĕ те пирĕн больницăрах вăй хурать - Эльза Валерьевна Сидорова та терапевт. Эльзăн йăмăкĕ Татьяна Валерьевна Костякова Шупашкарта стоматологра тимлет.

 . Александр Петрович Яковлев наркологпа унăн мăшăрне Ольга Борисовна Яковлева терапевта та округра пĕлмен çын çук, вĕсем нумай çул ĕнтĕ райбольницăра ырми-канми вăй хураççĕ. Вĕсен ывăлĕ Евгений вара Хусанта ортодонтра тăрăшать.

. Нелли Валериановна Прокопьева терапевтăн хĕрĕ Зинаида Владимировна Майорова Çĕнĕ Шупашкарта пĕтĕмĕшле практика врачĕнче тăрăшать.

 . Чылай çул райбольницăра анестезиологипе реанимаци уйрăмĕн заведующийĕнче ырми-канми тăрăшакан Вячеслав Михайлович Ейковăн хĕрĕ Анна та ашшĕн çулĕпе кайма тĕллев лартнă, халĕ вăл Мускаври Пирогов ячĕллĕ РНИМУ-ра ординатурăра пĕлĕвне тарăнлатать. Кĕçĕн хĕрĕ Екатерина паянхи кун Мускавра И.М.Сеченов ячĕллĕ Пĕрремĕш МГМУ-ра медицина енĕпе аслă пĕлỹ илет, 3 курс студенчĕ.

. Педиатрта нумай çул ĕçлекен Елена Владимировна Матвееван хĕрĕ Диана паянхи кун тухтăр ĕçĕн вăрттăнлăхĕсене ăша хывать, Чăваш патшалăх университетĕнче аслă пĕлỹ илет.

. Наталья Владиславовна Паденова гинекологăн хĕрĕ Реда тĕп хулара хирурги медсестринче тăрăшать. Палăртмалла, Наталья Паденован асламăшĕ Ульяна Ва-сильевна Петрова Шупашкарта чылай çул тĕп тухтăр çумĕнче ĕçленĕ.

. Алина Михайловна Фадеева стоматологăн хĕрĕ те амăшĕн çулнех суйласа илнĕ. Кристина Александровна Хохлова тĕп хулара шăл тухтăрĕнче вăй хурать. Алина Михайловнăн амăшĕ Юлия Ивановна Серина хăйĕн ĕмĕрне райбольницăра медсестрара ĕçлесе ирттернине те палăртса хăвармалла.

. Психиатр пỹлĕмĕнче медицина сестринче чылай çул тимлекен Майя Геннадьевна Кузьминан хĕрĕ Мира шăл тухтăрне вĕренсе тухнă. Мира Петровна Кондратьева паянхи кун тĕп хулара тăрăшать.

. Хирург пỹлĕмĕнче нумай çул ĕçлекен Лариса Ивановна Моложинан хĕрĕ Екатерина Олеговна Большова та амăшĕ пекех медсестра ĕçне суйласа илнĕ, медколледжран вĕренсе тухнă, тĕп хулара ĕçлет.

 . Лабораторире чылай çул вăй хуракан Татьяна Ильинична Саринан хĕрĕ Анна медицина колледжне пĕтернĕ хыççăн Шупашкарта медицина сестринче тимлет.

 . Çак çемьесем пирки асăнсан та ытлашши пулмĕ, вĕсем пирки эпир хаçатра çырнăччĕ. Акă, УЗИ врачĕн Константин Владимирович Ивановăн хĕрĕ Анастасия та ашшĕ пекех тухтăр пулас тенĕ, хамăр больницăра терапевт-участковăйра ĕçлеме тытăнчĕ, ывăлĕ Артемий вара Чăваш патшалăх университечĕн медицина факультечĕн студенчĕ. Васкавлă пулăшу уйрăмĕнче тăрăшакан Ирина Никола евна Тинехпейкинан хĕрĕ Виктория паянхи кун райбольницăра шăл тухтăрĕнче тимлет. Флюорографи пỹлĕмĕнче медицина сестринче вăй хуракан Альбина Владимировна Алексееван хĕрĕ Регина чи малтан Шупашкарти медицина колледжĕнче ăс пухнă, халĕ педиатра вĕренет.

Кун пек ырă тĕслĕхсем сахал мар. Малалла та шур халатлă ĕçченсен ачисем, мăнукĕсем вĕсен çулĕпех утчăр, çак пархатарлă ĕçре вăй хурса ырă ят-сум çĕнсе илччĕр.

Надежда Мидакова