Раççей Федерацийĕн Тĕп саккунне - Конституцие - кĕртме сĕннĕ пĕлтерĕшлĕ тỹрлетỹсен йышĕнче экологи çинчен калаканни те пур. Пирĕн çĕршыв хăйĕн илемлĕ çутçанталăкĕпе, унăн ырлăх-пурлăхĕпе чăннипе те пуян. Анчах та пирĕн паянхи кунпа кăна пурăнмалла мар, малалли пирки те шухăшламалла. Çак пуянлăхпа пирĕн ачасем, вĕсен ачисем те усă курма пултарччăр. Çавăнпа та çакăн пирки каланисене Конституцие кĕртсе хăварни тĕрĕс, вырăнлă тата вăхăтлă тесе шутлатăп.

Юлашки çулсенче çынсен пурнăç тăршшĕне вăрăмлатасси пирки сахал мар калаçаççĕ пулсан, хамăрăн тăван тавралăх пирки те манмалла мар. Экологи те çынсен пурнăçĕ çине витĕм кỹрет-çке. Экологи культурин ыйтăвĕсем пуриншĕн те пĕлтерĕшлĕ пулса тăраççĕ. Çутçанталăка хирĕç тунă ĕç малашне Конституци нормисене хирĕçле тунă ĕç пулса тăрĕ.

Экологи ыйтăвĕ хальхи вăхăтра пĕтĕм тĕнче шайĕнчех çивĕч тăрать. Этемлĕхĕн çутçанталăка упрасси, тавралăха хỹтĕлесси пирки халех шухăшламалла. Унсăрăн вăл пире каçармĕ. Çавăнпа экологи пирки калаçни кăна çителĕксĕр. Тăван тавралăх ырлăх-пурлăхĕшĕн çине тăрса ĕçлеме пуçламалла. Çакна кашнин хăйĕнчен тытăнмалла. Тавралăх тасалăхĕпе тирпейлĕхĕшĕн тăрăшасси, ăна упрасси кашнин тивĕçĕ пулнине манмалла мар. Çапла çеç эпир хамăр çĕршывăн илемлĕ те пуян çутçанталăкне малашнехи ăрусем валли сыхласа хăварма пултарăпăр.