Нумаях пулмасть районта иртнĕ ачасен пултарулăхĕн гала-концертĕнче чăвашлăхпа, Иван Яковлевич Яковлевпа çыхăннă номерсем те пулчĕç. Паян вĕсемпе тĕплĕнтерех паллаштаратпăр.

Сăвăсем илемлĕ вуларĕç

Концертра Шулю шкулĕнче вĕренекен Регина Жидковапа Атнар шкулĕнче пĕлỹ илекен Анастасия Кузьмина чăвашла сăвăсене питĕ илемлĕ вуласа пачĕç. Регина Валентина Тарават çырнă "Яковлев мăнукĕсем" сăвва вуларĕ, Настя - Тамара Перепелкинан "И.Я.Яковлева халалласа" сăввине. Питĕ хитрен те уççăн янăрарĕ чăваш сăмахĕ! Ачасен сăвăсем вулас ăсталăхĕ куракансене килĕшни вĕсем тăвăллăн алă çупнинчен сисĕнчĕ.

Пĕчĕк спектакль кăтартрĕç

Мăн Этменти вăтам шкул çумĕнчи Татьяна Горбунова ертсе пыракан ачасен фольклор ансамблĕ гала-концертра сцена çине "Выртмара" композиципе тухрĕ. Иван Яковлев калавĕсем тăрăх хатĕрленĕ хăйне евĕр пĕчĕк спектакль лартса пачĕç ачасем. Çи-пуçне те ĕлĕкхи вăхăтпа килĕшỹллĕн тăхăннă - сăхмансем, çăпата, тĕрленĕ кĕпе-саппун...

Чăвашла питĕ аван, пĕр такăнмасăр калаçакан ачасем çине пăхма кăмăллă пулчĕ, вĕсем хăйсене сцена çинче артистсем пекех тытрĕç.

А.КАРПОВА.