Хĕрлĕ Чутайри вăтам шкулта пур предметпа та аван вĕренекен, пултарулăхне тĕрлĕ енлĕ аталантаракан вĕренекенсем чылай. Çакăн пек маттур вĕренекенсенчен пĕри вăл - 10 А класра пĕлỹ илекен Светлана Юрьевна Пахинова.

Светлана пуçламăш классенченех "пилĕк" паллăсемпе вĕренсе пырса пĕлĕвĕ çирĕп пулнине кăтартать. Вырăс чĕлхипе, математикăпа, биологипе район шайĕнчи олимпиадăсене хутшăнса пĕрремĕш вырăн йышăнать, ытти предметсемпе - акăлчан чĕлхипе, историпе, чăваш чĕлхипе тата литературипе - призерсен йышне кĕрет. Тин кăна çырма хăнăхакансен республика шайĕнчи конкурсĕнче те çĕнтернĕ вăл.

Вĕренекеншĕн кĕнекепе туслă пулни питĕ пĕлтерĕшлĕ, анчах та тавракурăма анлăлатнипе пĕр-лех спортпа туслашма та, ташлама-юрлама та вăхăт тупмалла. Светлана та, çакна тĕпе хурса, хĕрсен командипе пĕрле волейболла выляма çỹрет. Чылай çул хушши ĕнтĕ музыка шкулĕнче пианинăпа калама вĕренет. Район е республика шайĕнчи чылай акцисемпе конкурссене хутшăнать Светлана. Сăпайлă та ырă кăмăллăскер, тулли яваплăхпа вĕренекенскер маттур хĕрупраç ыттисемшĕн ырă тĕслĕх пулса тăрать.

А.КАРПОВА.