Тури Çĕрпỹкасси ялĕнче Çĕнтерỹ кунĕ умĕн Аслă Отечественнăй вăрçа хутшăннă ентешсене халалласа асăну мемориалне уçнă. Палăртмалла, асăннă ялтан фронта 151 çын тухса кайнă, вĕсенчен 92-шĕ вăрçăран таврăнайман. Асăну мемориалне пуçаруллă бюджет программипе тунă, ăна çĕклесе лартас пĕтĕмĕшле тăкак 345 пин ытла тенкĕпе танлашнă.

- Ял çыннисем палăк тума пĕтĕмпе 34500 тенкĕ хыврĕç, район бюджетĕнчен 34500 тенкĕ уйăрчĕç, ытти укçи - республика бюджетĕнчен. Ял çыннисенчен Еленăпа Вячеслав Филипповсене ырăпа асăнмалла, вĕсем ку ырă ĕç валли пилĕк пин тенкĕ пачĕç. Çак ялта çуралса ỹснĕскерсем, аякра пурăннă хыççăн тăван ялах таврăнчĕç, çурт та çĕклерĕç.

Палăк тăвас ĕçе Владислав Савинкин уйрăм предприниматель ĕçченĕсем пысăк яваплăхпа тăрăшса кĕске вăхăтра вĕçлерĕç. Палăртса хăвармалла, кун евĕр палăк 2021 çулта Тракушкăнь ялĕнче те турăмăр, укçине çак ялта çуралса ỹснĕ Римма Праулова нотариус хыврĕ.

Пĕтĕмĕшле илсен, кăçал эпир хамăр Хусанушкăнь территори пайĕнче сакăр проект пурнăçлама палăртрăмăр. Тихăнушкăнче спорт площадкине те туса пĕтернĕ ĕнтĕ, - пĕлтерчĕ Хусанушкăнь территори пайĕн начальникĕ Любовь Кузнецова.