Юлашки çулсенче вырăнта пурăнакансен пуçарулăхĕ çинче никĕсленнĕ бюджетпа усă курса хĕрлĕчутайсем сахал мар проект пурнăçа кĕртеççĕ, чылай çĕрте çулсем юсаççĕ, ачасем валли вылямалли тата спортпа туслашмалли площадкăсем тăваççĕ, пĕвесем тасатаççĕ. Пĕр сăмахпа каласан, ялсен сăн-сăпачĕ илемленсе, хăтлăланса, ырă енне улшăнса пырать. Ку енĕпе ĕçсем малалла пыраççĕ.

Муниципаллă округ администрацийĕн экономика, инвестици ĕçĕ-хĕлĕн, çĕр тата пурлăх хутшăнăвĕсен пайĕнчен пĕлтернĕ тăрăх, кăçал пурĕ 60 миллиона яхăн тенкĕлĕх (республика бюджетĕнчен - 48 миллиона яхăн тенкĕ) 59 проект пурнăçланмалла. Вĕсенчен ытларахăшĕ - 20 проект - çул юсавĕпе (20 миллиона яхăн тенкĕлĕх), 14-шĕ пĕвесене пушар хăрушсăрлăх тĕлĕшпе йĕркене кĕртессипе тата тасатассипе (9 миллион ытла тенкĕлĕх), 13-шĕ шыв пăрăхĕсене çĕнетессипе е шыв башнисене юсассипе (21,7 миллион ытла тенкĕлĕх), 5-шĕ асăну мемориалне вырнаçтарассипе (5 миллион ытла тенкĕлĕх), 2-шĕ ача-сем валли выляв площадкисем тăвассипе (1,2 миллион ытла тенкĕлĕх), 2-шĕ территорисене хăтлăх кỹрессипе (2,5 миллион ытла тенкĕлĕх), 2-шĕ масар патĕнче хăтлăх кỹрессипе (1,5 миллиона яхăн тенкĕлĕх), пĕри çỹп-çап площадкине вырнаçтарассипе (335 пин ытла тенкĕлĕх) çыхăннă.