Юлашки çулсенче патшалăх ял çыннине тĕрлĕ пулăшу парса тĕревлет. Вĕсенчен пĕри - социаллă контракт. Унпа усă курса тин кăна вĕренсе пĕтерсе алла специальность илнĕ çамрăксем ĕçе вырнаçма, теприсем услам ĕçне пуçарма е хăй тĕллĕн ĕçлекен пек регистрациленме, уйрăм хушма хуçалăхра выльăх-чĕрлĕх ĕрчетме е ăна тытса пыма техника туянма пултараççĕ.

Хĕрлĕчутайсем те патшалăхăн çак пулăшăвĕпе активлă усă кураççĕ. Муниципаллă округ администрацийĕн социаллă хỹтлĕх пайĕнчен пĕлтернĕ тăрăх, кăçалхи январь-июнь уйăхĕсенче округра пурăнакан 30 çын социаллă контракта алă пуснă. Вĕсенчен çиччĕшĕ уйрăм предприниматель пулма е хăй тĕллĕн ĕçлеме кăмăл тунă. Çиччĕшĕ уйрăм хушма хуçалăха аталантарас тĕллевлĕ пулнă. Вунулттăн ку пулăшупа ĕçе вырнаçма усă курнă.

2022 çулта вара пирĕн районта пурăнакан 83 çын социаллă контракта алă пуснă. Вуникĕ çын усламçă е хăй тĕллĕн ĕçлекен пулма шут тытнă. Çирĕм тăхăр çын ĕçе вырнаçнă. Вăтăр виççĕн ку пулăшупа хушма хуçалăха аталантарма усă курнă. Тăххăрăн (кунта сахал тупăшлă пĕччен икĕ е ытларах ача çитĕнтерекен тăлăх арăмсем, пĕччен икĕ е ытларах ача çитĕнтерекен хĕрарăмсем, нумай ачаллă çемьесем кĕреççĕ) патшалăх пулă-шăвне пула çемьен финанс лару-тăрăвне çирĕплетнĕ.

Аса илтеретпĕр, социаллă контракт çырма пурăнмалли чи пĕчĕк виçерен сахалрах тупăшлă çынсем е çемьесем кăна усă курма пултараççĕ.