Паян хĕрлĕчутайсенчен ятарлă çар операцине хутшăнакан сахал мар. Çапăçу хирĕнче хамăрăннисене пулăшас тесе Хĕрлĕ Чутай шкулĕн вĕрентекенĕсем маскировка тетелне çыхрĕç. Нумаях пулмасть штанашсем 48 мăшăр милĕк хатĕрлесе салтаксем патне ăсатрĕç.

Иртнĕ шăматкун муниципалитет пуçлăхĕ Иван Михопаров тата унăн çамрăксемпе ĕçлекен канашçи Игорь Чеченешкин «Хастар» физкультурăпа спорт комплексĕн стадионĕнче «Хамăрăннисене пăрахмастпăр» ятпа акци пуçарса ячĕç. Шкул ачисемпе аслисем, ĕç коллективĕсем, округ çыннисем ятарлă çар операцийĕнчи салтаксем валли маскировка тетелне çыхма тытăнчĕç. Маскировка тетелĕсене хатĕрлессипе иртекен акцие культура çурчĕсенче ĕçлекенсем те хастар хутшăнаççĕ. Акă, Сĕнтĕкçырминчи Культура çуртĕнче ятарлă вырăн та йĕркеленĕ. Хусанушкăнь территори пайĕнче ку ĕçе Зоя Ильинична Матвеева пуçарса янă.

Зоя Ильинична Матвеева:

- Эпĕ Иккĕмĕш Хурашашра пурăнатăп пулин те, Сĕнтĕкçырминчи Культура çуртне çỹреме вăхăт тупатăп. Хамăн ывăлăм та Украинăра ятарлă çар операцине хутшăнать. Çавна май Хусанушкăнь территори пайĕн пуçлăхĕнчен Любовь Кузнецоваран пулăшу ыйтрăм. Ял çыннисемпе, культура ĕçченĕсемпе салтаксене валли маскировка тетелĕ çыхма хатĕррине каларăм. Вăл пулăшма килĕшрĕ, материалне тупма пулăшрĕ, муниципалитет пуçлăхĕ Иван Михопаров та пуçарăва ырларĕ. Малтанах сахаллăн пухăнтăмăр. Халĕ вара кунран-кун пирĕн йыш хушăнать. Эпир пурте ывăлăмăрсем сывăтаса таврăнасса кĕтетпĕр. Эпир тунă япаласем вĕсене пулăшасса, чунĕсене ăшăтасса шанатпăр.