Халăх пурлăха регистрациленĕ чухне пур ĕçе те нотариус урлă тума хăнăхнă. Кун пек чухне самай тăкакланма тивет. Нумай функциллĕ центр урлă та çуртсене регистрацилеççĕ.

Пĕлме: пурлăха, çурта, муниципаллă округ администрацийĕнче тỹлевсĕрех регистрацилеме пулать. Ун пек чухне пошлина та тỹлеттермеççĕ. Çакна валли территори пайне çитмелле, çумра паспорт, СНИЛС пулмалла, территори пайĕнче хуçалăх кĕнекинче çырнине (выписка) илмелле. Заявлени çырмалла, унпа килĕшỹллĕн вырăнти хăйтытăмлăх органĕ гражданин ячĕпе ĕçлеме ирĕк илет.

Паянхи куна кăçал муниципаллă округра 87 çын çурта администраци урлă регистрациленĕ. Пĕтĕмпе 631 çуртăн,1735 çĕр лаптăкĕн хуçи паллă мар. 609 объектăн кадастр хакĕ те çук. Çакна ялсенчи пушă çуртсем те çирĕплетеççĕ. Вĕсене илекенсем пур-ха - уйрăмах хуларан килекенсем, уйрăм хушма хуçалăх тытма кăмăллакансем. Çавăн пекех муниципаллă округ администрацийĕ пулăшнипе кивелнĕ çуртсене те учетран тỹлемесĕрех кăларма май пур. Палăртмалла, чи малтан çурт вырнаçнă çĕр лаптăкне регистрацилемелле. Тĕплĕнрех вырăнти территори пайĕнче специалистсем ăнлантарса парĕç. Асăннă пулăшупа усă курăр, çуртăрсене регистраци тăвăр, укçăрсене перекетлĕр.

Ольга ФОНДЕРКИНА, округ администрацийĕн экономика, инвестици ĕçĕсен, çĕр тата пурлăх хутшăнăвĕсен пайĕн начальникĕ