Тралькассисен ĕçĕ-хĕлĕпе территори пайĕн начальникĕн тивĕçĕсене кăçалтанпа пурнăçлакан Надежда Геннадьевна БЕЛОВА паллаштарать:

- Тралькасси территори пайне пурĕ çичĕ ял - Тралькасси, Мучикасси, Хăмаркка, Кив Ирчемес, Карăкçырми, Шуккакасси, Турхан - кĕрет. Паянхи кун тĕлне 865 хуçалăх шутланать, вĕсенче пĕтĕмпе 1060 çын пурăнать: çулталăк тултарман пĕр ача, 1-17 çулхисем - 123 ача, ĕçлеме пултараканнисем - 621 çын, пенсионерсем - 315 çын.

Коллективра иккĕн кăна пулин те, эпир кашнинех пулăшма хатĕр. Ял çыннисем килсех тăраççĕ. Тĕрлĕ ыйтусене сỹтсе яватпăр. Ытти территори пайĕсем пекех пушар хăрушлăхĕ пирки ăнлантару ĕçĕсем ирттеретпĕр, йывăр лару-тăрури çемьесене сăнаса тăратпăр. Ялсен, масарсен тирпей-илемĕшĕн те тăрăшатпăр. Кашни ялтах çỹп-çап пуçтармалли контейнерсем пур. Вĕсене масарсем патне те вырнаçтарнă. Старостăсем тăрăшнипе, культура тата вулавăш ĕçченĕсем, ял хастарĕсем хутшăннипе тăтăшах субботниксем ирттеретпĕр.

"Пĕччен сурать - типсе ларать, халăх сурать - кỹлĕ пулать", - теççĕ-и-ха? Çавăнпа та пур ĕçе те пĕрле тăватпăр. Çак ĕçе йĕркелеме ял старостисем пулăшаççĕ. Вĕсем: Лидия Андреевна Крыцова (Тралькасси), Галина Владимировна Мурайкина (Мучикасси), Василий Иванович Афанасьев (Турхан), Светлана Александровна Горланова (Шуккакасси), Юрий Григорьевич Ербулаткин (Карăкçырми), Андрей Геннадьевич Апалеев (Хăмаркка), Владимир Андреевич Никитин (Кив Ирчемес).

Хамăр пурăнакан вырăн малашне те аталанса, ешерсе пытăр тесе тăрăшатпăр. Ял çыннисен пурнăçне лайăхлатас енĕпе малашне те ĕçлĕпĕр.