Раиса БЕРЕЗИНА, Шулю ялĕнче пурăнакан:

- Паянхи кун ялсенче пурăнакансен пурнăçне лайăхлатасси çивĕч ыйтусенчен пĕри пулса тăрать. Çынсем ялтах пурăнас кăмăллă пулччăр тесен унти условисене хуларисенчен кая мар йĕркелемелле. Ку ыйтăва татса пама пуçаруллă бюджет программи пулăшать. Çак механизм вырăнта пурăнакансене хăтлăх кỹмелли тата инфратытăма аталантармалли хăш проект кирлине суйлама май парать. Акă, эпир, Шулю тата Пĕрремĕш Липовка ялĕсенче пурăнакансем, асăннă программăсене активлă хутшăнатпăр. Шыв кĕртрĕмĕр, пушар хăрушсăрлăхне тивĕçтерме меллĕ пултăр тесе пĕве тасатрăмăр, ялти Культура çурчĕн территорине хăтлăх кỹтĕмĕр, çулсене йĕркене кĕртетпĕр.

Чăн та, асăннă программăсем пурри ял çыннине пуçарупа тухма, унтан вĕсем мĕнле пурнăçланса пынине тĕрĕслесе тăма май парать. Вырăнта пурăнакансен тата влаçăн пĕрлехи ĕçне пула территорисем аталанаççĕ, хăтлăрах, илемлĕрех те илĕртỹллĕрех пулса пыраççĕ. Çакă тỹрремĕнех ялта пурăнакансен пурнăç пахалăхне лайăхлатма витĕм кỹрет. Çавăнпа та эпир Чăваш Республикин Правительствине ял çыннисен пуçарăвĕсене ырланăшăн тав тăватпăр, малашне те кун евĕр программăсене хутшăнма хатĕррине палăртатпăр.