Чăваш Республикин Пуçлăхĕ Олег Николаев кăçалхипе тăваттăмĕш хут Чăваш Республикин Патшалăх Канашне Çырупа тухрĕ. Ку тĕп документ 2024 çулта республика умне лартнă пĕлтерĕшлĕ программа шутланать. Çырура Олег Николаев республика аталанăвĕн программипе килĕшÿллĕн çынсене уйрăмах кăсăклантаракан, кашни тытăмрах вăраха ямасăр татса памалли ыйтусене хускатрĕ.
Çырури тĕп самантсем çинче чарăнса тăрăпăр:
● Кăçал 15 педагогăн "Земство учителĕ" федераци программипе ĕçе вырнаçма май пулĕ.
● 2024-2026 ҫулсенче Чăваш Енре 49 шкула тĕплĕн юсаса ҫĕнетме палăртнă. Ку хисеп пысăкланма та пултарĕ.
● 2023 çулта ятарлă çар операцине хутшăннă 900 çын реабилитаци мероприятийĕсене хутшăннă. Кăçал реабилитаци ĕçне пурнăçа кĕртме "çул-йĕр картти" хатĕрлеме палăртнă.
● 5 çул хушшинче тăлăх ачасене, 5 тата ытларах çул çитмен ачаллă çемьесене пурăнмалли вырăнпа тивĕçтерĕç. Вĕсем 2023 çул пуçланиччен черетре тăнине шута илĕç.
● Фермерсен суту-илÿ речĕсене йĕркелес ĕçе республикипех сарасшăн.
● Экспорт тĕлĕшĕнчен Чăваш Ен çĕнĕ регионсемпе ĕçлеме тытăнчĕ, чи малтанах – Кăнтăр тата Ази çĕршывĕсемпе.
● Пĕр çулталăкра Чăваш Енре 20 ытла çĕршыв (Инди, Китай, Перу, Казахстан, Таджикистан, Турци, Алжир, Монголи, Индонези тата ыттисем) делегацийĕсем пулнă. Тулашри суту-илÿ кăтартăвĕсем иртнĕ çулхинчен 24% ытларах пулса тăнă.
● 2024 çулта Чăваш Енре çĕнĕ ăру вулавăшĕсен шучĕ 28-а çитĕ. 2024-2025 çулсенче кашни муниципалитетра çакнашкал пĕр библиотека та пулин пултăр тесе тăрăшмалла.
● 2025 çулта кашни муниципалитетрах автоклуб ĕçне йĕркелеме палăртаççĕ.
Олег Николаев Чăваш Республикин Патшалăх Канашне янă Çыру ҫинчен мĕн шухăшланине QR-код пулăшнипе пĕлтерме май пулчĕ.