Тĕнчере тĕрлĕ професси нумай, пурте вĕсем пĕлтерĕшлĕ. Кашни çын професси суйланă чух пысăк утăм умĕнче тăрать, мĕнле ĕç суйласа илнинчен унăн пĕтĕм пурнăçĕ килет-çке. Хăшĕ-пĕришĕн професси суйласа илесси çăмăллăн иртет, тепри пурнăç тăршшĕпех чуна килĕшекеннине шырать, пĕр çĕртен тепĕр çĕре ĕçлеме куçать. Анчах та пирĕн хушăра чуна килĕшекен ĕçе вырнаçса пурнăç тăршшĕпех унта вăй хуракан çынсем те сахал мар. Паян шăпах çакăн пек çемьепе паллашăпăр.

Акă, Надежда Терентьевна Петрованах (хĕр чухнехи хушамачĕ Николаева) илер. Вăл 1936 çулта Тракушкăнь ялĕнче çуралса ỹснĕ. Унăн ачалăхĕ çăмăл килмен, вăл хаяр та тертлĕ вăрçă çулĕсемпе пĕр килнĕ. Вăл вăхăтри ачасен выçăллă-тутăллă вăхăтсене чăтса ирттерме тивнĕ. Ỹссе çитсен хĕр вырăнти колхозра ĕçленĕ. Надежда Çĕрпỹ каччипе Виталий Петрович Петровпа çемье çавăрнă. Çамрăка ку тăрăха ялхуçалăх институтне пĕтернĕ хыççăн агрономра ĕçлеме янă пулнă. Унтан вăл колхоз председателĕнче те тăрăшнă. Каярах яваплă та тăрăшуллăскерне райкома ĕçлеме чĕнсе илнĕ. Кунта та вăл хăйĕн тивĕçне тỹрĕ кăмăлпа пурнăçланипе палăрнă. Шел те, унăн пурнăçĕ кĕске пулнă, чире пула унăн ĕмĕрĕ 1984 çулта татăлнă. Ун чухне вăл 47 çулта çеç пулнă.

Çемье пуçĕн тăтăшах Чутая ĕçе çỹреме тивнĕрен çемье 1975 çулта ялтан район центрне куçса килме шутланă. Шăпах çав çултан ĕнтĕ Надежда Терентьевна Хĕрлĕ Чутайри çăкăр заводĕнче çăкăр-кулач пĕçерекенре ĕçлеме тытăннă. Вăл вăхăтри ĕç условийĕсене паянхисемпе танлаштарма çук ĕнтĕ. Хальхи вăхăтра кăмакисем те çĕнĕ, ытти ĕç хатĕр-хĕтĕрĕ те пач урăхла. Çăмăл мар пулнă пулин те, Надежда Терентьевна кунта мĕн тивĕçлĕ канăва тухиччен, пĕр улшăнми, 1991 çулччен ырми-канми ĕçленĕ. Ăна коллективра та хисепленĕ, çамрăксем унран вĕренсе пынă, тĕслĕх илнĕ. Надежда Петровнăна лайăх ĕçшĕн ертỹçĕсем пĕрре мар тĕрлĕ Хисеп хучĕсемпе хавхалантарнă. "Ĕç ветеранĕ" хисеплĕ ята тивĕç пулнă вăл.

Палăртмалла, Надежда Терентьевна ултă чун тĕпренчĕкне - пилĕк хĕрпе пĕр ывăла - кун çути парнеленĕ, ура çине тăратнă, пурнăç çулĕ çине кăларнă, ашшĕ çут тĕнчерен уйрăлсан ачисемшĕн тĕрек пулнă. Шел те, 2023 çулхи январĕн 31-мĕшĕнче Надежда Терентьевнăн чĕри ĕмĕрлĕхех тапма чарăннă.

1963 çулхи августăн 27-мĕшĕнче кун çути курнă хĕрĕ Валентина та хăйĕн пурнăçне потребительсен кооперацийĕпех çыхăнтарнă. 1983 çулта райпора ĕçлеме пуçланă. Кооператив техникумĕнчен вăл куçăмсăр майпа ăнăçлă вĕренсе тухнă. 41 çул ĕнтĕ вăл çак тытăмрах вăй хурать. Валентина Витальевна 1994 çултан тытăнса чылай çул универсаллă ярмăрккăн заведующийĕнче тимлерĕ. Хальхи вăхăтра вăл склад заведующийĕнче тăрăшать. Унăн ĕçне те пысăка хурса хаклаççĕ. Çакна унăн наградисем аванах çирĕплетсе параççĕ. Валентина Витальевнăна "Раççей Федерацийĕн потребительсен кооперацийĕнче тỹрĕ кăмăлпа ĕçленĕшĕн" паллăпа, "Потребительсен кооперацийĕнче 20 çул пĕр кăлтăксăр ĕçленĕшĕн" тата "Потребительсен кооперацийĕнче 30 çул пĕр кăлтăксăр ĕçленĕшĕн" палăрту паллисемпе, "Раççей Федерацийĕн потребительсен кооперацине 180 çул" медальпе наградăланă. Ăна панă Хисеп хучĕсен шучĕ те çук. Валентина Михеевана "Чăваш Республикин потребительсен кооперацийĕн ветеранĕ" хисеплĕ ят та панă. Палăртмалла, Валентина Витальевнăн мăшăрĕ Владимир Анатольевич Михеев та райпора 1995-1998 çулсенче водительте тăрăшнă. Унсăр пуçне вăл мăшăрне ярмăрккăн заведующийĕнче ĕçленĕ чух сахал мар пулăшнă. Михеевсен икĕ ывăлĕ те, Евгенийпа Виталий, коопераци институтĕнчен вĕренсе тухнине те палăртса хăвармалла.

Надежда Терентьевнăн хĕрĕ Галина та, 1966 çулхи июнĕн 5-мĕшĕнче çуралнăскер, 38 çул ĕнтĕ райпон "Апатлану" тытăмĕнче вăй хурать. Ку ĕçе вăл 1983 çулта пикеннĕ. Паянхи кун та обществăлла апатланура тимлет. Чылайăшĕ ăна кунсерен райбольницăра буфетра курать. Галина Витальевна сиплев учрежденине килнĕ çынсене е кунта сывалаканнисене, райбольница ĕçченĕсене тĕрлĕ çемçе те тутлă кукăльпе, апатпа, ĕçмелли сĕткенсемпе тата ытти кирлĕ таварпа тивĕçтерет. Кунта çын кунĕпех татăлмасть. Галина Витальевна кашни çынпа кăмăллăн калаçма, мĕн кирлипе тивĕçтерме тăрăшать.

Галина Витальевнăна та ĕçтешĕсем хисеплеççĕ, унăн та тĕрлĕ Хисеп хучĕсем сахал мар. Вĕсем хушшинче Чăвашпотребсоюз Канашĕн председателĕ Валерий Павлов потребительсен кооперацийĕнче чылай çул тỹрĕ кăмăлпа ĕçленĕшĕн панисем те пур. Галина Витальевна тавар çаврăнăшĕн планне пурнăçласа пынăшăн пĕрре мар райпо Канашĕн Хисеп грамотине тивĕçнĕ. Акă, ăна 2011 çулхи пилĕк уйăх хушшинче пĕр ĕçчене тивекен тиев кăтартăвĕсемшĕн (виççĕмĕш вырăн йышăннă), 2012 çулхи пĕрремĕш çур çулти (виççĕмĕш вырăн çĕнсе илнĕ), 2015 тата 2016 çулсенчи пĕрремĕш çур çулти (пĕрремĕшпе виççĕмĕш вырăнсене тивĕçнĕ), 2018 çулхи пĕрремĕш çур çулти (пĕрремĕш вырăн йышăннă), 2021 çулхи тавар çаврăнăш планне пурнăçланăшăн Хисеп хучĕсем парса хавхалантарнă. Галина Наумован район администрацийĕн Хисеп хучĕсем те пур.

Надежда Петрован кĕрỹшĕ те, Зинаида хĕрĕн мăшăрĕ Геннадий Александрович Федоров, 2001-2004 çулсенче райпора водительте вăй хунă, тĕрлĕ ялти лавккасене кирлĕ таварсем вăхăтра çитерсе парас енĕпе тăрăшнă.

Зинаидăпа Геннадий Федоровсен хĕрĕ те - Олеся Тверскова - кооператив техникумĕнче вĕреннĕ. Вăл 10 çул хушши райпон "Апатлану" тытăмĕнче вăй хунă. Кунта буфетра та, "Березка" ресторанта тата Мăн Этменти шкулта аслă поварта та, кондитер цехĕнче те ĕçленĕ, технологра та тимленĕ.

Куратпăр ĕнтĕ, Надежда Терентьевнăн ачисем те амăшĕ пекех райпо тытăмĕнче чылай çул чунне парса ĕçлесе унăн аталанăвне пысăк тỹпе хываççĕ.