Районта пурăнакансем пĕлеççĕ ĕнтĕ, район хаçатне почта уйрăмĕсенчен кăна мар, редакцинчен илсе тăмалла та çырăнма пулать. Çак мелпе ытларах редакци çывăхĕнче пурăнакансем усă кураççĕ.

Акă Хĕрлĕ Чутайра пурăнакан Нина Викторовна Ладайкина та райхаçата эрнере икĕ хут редакцине килсе илет. "Район хаçатне мĕн хам ĕçлеме пуçланăранпах çырăнса илетĕп, - тет вăл. - Унсăрăн пурнăç çук, вăл юлташ пекех".

Тепĕр чухне вара Нина Викторовна район хаçатне редакцинчен тухичченех, крыльцарах ларса вулать. "Киле çитиччен чăтăмлăх çук, - тет вăл кăмăллăн, - хăвăртрах çĕнĕ хыпарсене, районта мĕн пулса иртнине, кама саламланине пĕлес килет".

Нина Ладайкина 35 çул хушши районти çыхăну уйрăмĕнче телефонисткăра тимленĕ. Мăшăрĕ "Сельхозхиминче" тракторпа ĕçленĕ. Ладайкинсем тăватă ывăлпа пĕр хĕре кун çути парнелесе пурнăç çулĕ çине тăратнă. Шел те, мăшăрĕ пилĕк çул каялла пурнăçран уйрăлнă. Паянхи кун Нина Викторовна пĕчченех пурăнать: "Хама юлташлăх ĕне усратăп", - тет вăл сăпайлăн. Ачисем тăван йăваран вĕçсе тухса кашни хăйĕн йăвине çавăрнă, вĕсем амăшĕ патне килсех тăраççĕ. Сакăр мăнукĕ те Нина Викторовнăна савăнăçпа чун канăçне парнелеççĕ.

А.КАРПОВА.