Чăваш Республикин цифра аталанăвĕпе информаци политикин тата массăллă коммуникацисен министрĕ Михаил Анисимов августăн 24-мĕшĕнче ĕçлĕ çулçỹревпе район хаçачĕн редакцийĕнче пулчĕ. Михаил Владимирович редакци коллективĕпе тĕл пулса вырăнти прессăна аталантарассипе çыхăннă ыйтусене сỹтсе яврĕ.

Аса илтеретпĕр, "Пирĕн пурнăç" район хаçачĕн тиражĕ паянхи кун виçĕ пинрен иртет. Ытти районсемпе танлаштарсан, ку кăтарту - лайăххисенчен пĕри. Чылай вулакан район тĕкĕрне почта уйрăмĕсем урлă çырăнса илет, анчах та альтернативлă çырăнтару та вăй илсе пырать. Çакна та каласа хăвармалла, хаçат хакне йỹнетсе вулакансене çăмăллăх кỹрес тесе çитес çултан хаçатçăсем район тĕкĕрне эрнере пĕр хутчен хулăнрах кăларма тытăнас шухăшлă.

Палăртмалла, Михаил Анисимов асăннă министерствăна июнь уйăхĕнче ертсе пыма тытăнчĕ. Унтанпа вăл тĕрлĕ районти редакци коллективĕсемпе тĕл пулчĕ. Сăмахран, районти редакци коллективĕпе курса калаçнă кунах Михаил Владимирович Етĕрнери, Элĕкри тата Муркашри хаçатçăсемпе те курнăçрĕ, актуаллă ыйтусене сỹтсе яврĕ.

Н.ПЕТРОВА.